1 мин

Дэлхийн дулаарал Монголд ашигтай

Цаг агаар дулаарснаар манай улсын ДНБ 1.4 хувиар нэмэгдэх юм байна.

М.Сугар-Эрдэнэ 2017.10.03 2 1

90

Олон улсын валютын сангаас гаргасан “Дэлхийн эдийн засгийн хөгжлийн хандлага” тайланд дэлхийн дулаарлаас хохирох болон ашиг олох улс орнуудыг нэрлэжээ.

Энэхүү тайлангаас харахад халуун бүс нутагт байдаг ядуу зүдүү орнууд уур амьсгалын өөрчлөлтөөс хамгийн их хохирол амсах юм байна. ОУВС-гийн судалгаагаар жилийн дундаж хэм 25 градус байдаг Бангладеш шиг оронд дундаж хэм нь ганцхан хэмээр нэмэгдэхэд л ДНБ нь 1.5 хувиар буурч, энэ уналт доод тал нь 7 жил үргэлжлэх гэнэ. Ер нь цаг агаарын дулаарлаар дэлхийн хүн амын 60 хувь нь хохирол хүлээх гэнэ.

Харин хүйтэн сэрүүн орнуудын эдийн засгийн өсөлт нэмэгдэж, хөгжин цэцэглэх гэнэ. Дэлхийн дулаарлаас хамгийн их ашиг олох орнуудыг Монгол Улс тэргүүлж байна. Цаг агаар дулаарснаар манай улсын ДНБ 1.4 хувиар нэмэгдэх юм байна. Манай улсын дараагаар Исланд ДНБ-ий өсөлт 1%, Финланд ДНБ-ий өсөлт 0,9%, ОХУ ДНБ-ий өсөлт  0,8%-тайгаар жагсжээ. Дэлхийн дулаарал эерэгээр нөлөөлөх эхний 10 оронд мөн Норвеги, Канад, Швед, Эстон, Казахстан, Латви багтсан байна.
Мэдээж Олон улсын валютын сангийн тайлан ёсоор цаг агаарын өөрчлөлтөөр дээр дурдсан улс орнууд шууд халуун дулаан диваажин болчихгүй. Дэлхийн дулаарал яг ямар нөлөө үзүүлэхийг ч эрдэмтэд бүрэн гүйцэд судлаж амжаагүй байгаа билээ.

М.Сугар-Эрдэнэ 2017.10.03

90