Колумб дуучин Малума “ДАШТ 2018” тэмцээний сүлд дууг зохионо
Амстердамд болсон түүний тоглолтыг үзэж яваад “МС”-гийн довтлогч Серхио Агуэро осолд орж, гэмтсэн юм.
Өмнөд Америкийн Колумб улсын 23 настай дуучин Малума ирэх жил ОХУ-д болох хөлбөмбөгийн ДАШТ-ий албан ёсны сүлд дууг зохиохоор болж, FIFA-тай гэрээ байгуулжээ. Түүнтэй 24 уран бүтээлч хамтран ажиллах бөгөөд Пуэрто Рикогийн дуучин Бэд Баннитэй хамтран дуулах бололтой. Сүлд дууг 12 дугаар сард бэлэн болно гэж Олон улсын хөлбөмбөгийн холбооноос мэдэгдсэн.
Хуан Луис Ландоньо Ариас буюу Малума нь реггетон стилэр уран бүтээлээ туурвидаг дуучин, хөгжмийн зохиолч юм. Түүний “El Perdedor” клипийг youtube суваг дээр тэрбум гаруй хүн үзэж сонирхсон байна.
Авьяаслаг уран бүтээлчээс гадна Малума Өмнөд Америкийн хөлбөмбөгийн одуудтай дотно найз. Голландын Амстердамд саяхан болсон түүний тоглолтыг үзэж яваад “Манчестер Сити”-гийн довтлогч Серхио Агуэро осолд орж, гэмтсэн юм. Агуэрогоос гадна Малумагийн найзууд гэвэл “Барселона”-гийн Лионель Месси, Луис Суарес, “ПСЖ” багийн Неймар нарыг нэрлэж болно.
Колумб дуучин ДАШТ-ий сүлд дууг зохиох болсон явдлыг оросууд тайван хүлээж авлаа. ОХУ-ын хөгжимчин, жүжигчдийн хөлбөмбөгийн багийн ахлагч Юрий Давыдов “Малума ч байна уу, өөр гадаадын хэн ч байсан хамаа алга. Олег Газманов, Игорь Крутой нараар зохиолгоод Дима Билан дуулснаас л хавьгүй дээр” гэж сэтгүүлчдэд мэдэгдсэн юм.
“ДАШТ 2014” сүлд дуу
“ДАШТ 2010” сүлд дуу
“ДАШТ 2006” сүлд дуу
“ДАШТ 2002” сүлд дуу