Монголчууд Путиныг бишрэгч Ерөнхий сайдтай болсон тухай нийтлэл гадны хэвлэлд гарчээ
“Quartz” сайтад “Монголчууд Путиныг бишрэгч, шийдэмгий сайдтай боллоо” нэртэй нийтлэл тавигджээ.
Монгол Улсын 30 дахь Ерөнхий сайдаар Ухнаагийн Хүрэлсүх томилогдоод удаагүй байна. Шинэ Ерөнхий сайдын талаар гадаадын хэвлэлүүдэд ч онцолж эхэлсэн. Америкийн “Quartz” сайтад “Монголчууд Путиныг бишрэгч, шийдэмгий сайдтай боллоо” нэртэй нийтлэл гарчээ.
Монгол Улсын Ерөнхий сайд “Нударга” хочит У.Хүрэлсүх фэйсбүүк хуудаснаа ОХУ-ын Ерөнхийлөгч В.Путинтай төстэй байдлаар зураг нийтэлдэгээрээ алдартай. Монголын Харли сонирхогчдын холбоог тэргүүлдэг, хурандаа цолтой У.Хүрэлсүх есдүгээр сард Ерөнхий сайдын ажлаа өгсөн Ж.Эрдэнэбатын суудлыг эзэлж байна.
3 сая хүн ам бүхий хязгаарлагдмал зах зээлтэй Монгол Улс гадаад зах зээлд төдийлөн нөлөөлдөггүй ч төрийн тэргүүн сайд нь солигдоход Хойд Солонгос тэргүүтэй улсад таатай байдал үүсч болох юм. Хойд Солонгос Монголоор дамжуулан олон улстай харилцсаар ирсэн. “Монгол Улс эртнээс л Солонгосын хойг дахь дүр зургаа амжилттай бүтээсэн. Хойд, Өмнөд Солонгос аль аль нь итгэж болох цор ганц улс Монгол болж байна” гэж Колумбын их сургуулийн Солонгос судлаач эрдэмтэн Чарлес Армстронг бичиж байлаа.
“Монголын Засгийн газар Пхеньян болон АНУ-ын зуучлагч болсоор байна. Сүүлийн жилүүдэд АНУ, Япон зэрэг улсын төлөөлөгчид Хойд Солонгосын төлөөлөгчидтэй уулзах хамгийн тохиромжтой газар Бээжин, Москвад гэхээс илүү Улаанбаатар байв. Хойд Солонгос эртнээс л Монгол Улстай төдийлөн сөргөлдөж, хурцадмал байдал үүсгэж байсангүй“ гэж Канадын их сургуулийн багш, Монгол судлаач эрдэмтэн Жулиан Диеркес хэлжээ. Монгол Улсын шинэ Ерөнхий сайд шинээр сонгогдсон жүдо бөхийн тамирчин Ерөнхийлөгчтэйгөө улс төрд биш юм гэхэд эдийн засагт хамтран ажиллахаас аргагүй. Учир нь Олон Улсын Валютын сангийн хөтөлбөр ёсоор Монгол Улс 440 сая ам.долларын санхүүжилт буюу нийт 5.5 тэрбум орчим ам.долларын хөнгөлттэй зээлд хэдийн хамрагдсан билээ.