Харүмафүжи Ичиножёод тусгайлан хичээл заалаа
Харүмафүжи “Мэддэг, чаддаг юмнуудаа хэлж, заалаа. Хэлсэн юмыг минь толгойдоо хийж, хичээн зүтгэвэл амжилтад хүрнэ. Бүх юм өөрөөс нь шалтгаална” гэж хэлсэн
Мэргэжлийн сүмогийн Намрын тойргийн барилдаан Шизүока мужийн Хамамацү хотод үргэлжлэн явагдаж байна. Энэ үеэр ёкозүна Харүмафүжи маэгашира Ичиножёод тусгайлан хичээл заажээ. Хөл тавих зэрэг сүмогийн үндсэн дасгалаас эхлэн барьц авах дасгал зэрэг 30 минут гаруй сургалт явуулсан ёкозүна Харүмафүжи “Засаж хэлэх юм байсан болохоор хэдэн юм заалаа. Тачиай дээр нэлээд ажилласан. Мэддэг, чаддаг юмнуудаа хэлж, заалаа. Хэлсэн юмыг минь толгойдоо хийж, хичээн зүтгэвэл амжилтад хүрнэ. Бүх юм өөрөөс нь шалтгаална” гэж хэлсэн бол Ичиножёо “Тачиай дээр мөргөлдөөд шууд зүүн мавашины барьц авах талаар бэлтгэл хийлээ. Хэрэв ингэж чаддаг болох юм бол хэнээс ч айхгүй болно. Өөртөө итгэх итгэл ч нэмэгдэнэ. Дээд зиндааны дээд хэсэгт барилдмаар байна. Аваргад их баярлалаа” гэж ярьсан байна.