Жүдо: Үнэмлэхүй жингийн ДАШТ-д манай 4 бөх зодоглоно
Түрүү бөх 100 мянган евро, 2-р байр 50 мянга, 3-р байр 25 мянган еврогийн шагнал хүртэнэ.
Олон улсын жүдо бөхийн холбооноос 11 дүгээр сарын 11-12-нд Мароккод үнэмлэхүй жингийн ДАШТ зохион байгуулахаар зарласан билээ. Шагналын сан тун өндөр энэ тэмцээн жүдо сонирхогчдын анхаарлыг ихэд татаж байгаа. Түрүү бөх 100 мянган евро, 2-р байр 50 мянга, 3-р байр 25 мянган еврогийн шагнал хүртэнэ. Нийт сан 500 мянган евро.
Грекийн жүдогийн домог, олимпийн алт, хүрэл медальт, дэлхийн 3 удаагийн аварга Илиас Илиадис зодог тайлсан ч гэсэн үнэмлэхүй жинд барилдахаар мэдүүлгээ өгсөн байна. Гэхдээ түрүүлэхэд нь түүнд том саад болон бий. Юуны өмнө ялагдашгүй аварга Францын Тедди Ринер. Мөн Голландын Рой Мейер, Оросын Александр Михаилин, Чехийн Лукаш Крпалек, Гүржийн Варлам Липартелиани, Гурам Тушишвили, Францын Сириль Маре, Израилийн Ор Сассон гээд олон алдартнууд үнэмлэхүй жингийн ДАШТ-д оролцох гэж байна.
Манай улсаас 4 тамирчин оролцоно. Олимпийн алт, мөнгөн медальт Н.Түвшинбаяр болон Ө.Дүүрэнбаяр, Б.Тэмүүлэн, Л.Отгонбаатар нар бэлтгэлээ базааж байна.