Модонд уяж, байгальд үлдээсэн хадгийг устгаж, цэвэрлэжээ
“Хадгаа дээдэлье, байгалиа хамгаалъя” уриалга гаргасан байна.
Нийслэлийн Байгаль орчны газар, Монголын Бурхан шашинтны төв Гандантэгчэнлин хийд, Монголын Бөөгийн нэгдсэн эвлэл хамтран “Хадгаа дээдэлье, байгалиа хамгаалъя” уриалга гарган ажиллалаа.
Энэхүү уриалгын хүрээнд “Тарвалин” хийдийн лам хуврагуудтай хамтран өнгөрсөн амралтын өдрүүдэд Баянзүрх дүүргийн 20, Сонгинохайрхан дүүргийн 24, 25 дугаар хорооны нутаг дэвсгэрт ажиллав. Ногоон бүсийн ой, ургаа модонд хадаг уях, шашны зан үйлтэй холбоотой эдлэл хэрэгслийг их хэмжээгээр тавьж орхих зэрэг нь байгаль орчинд сөрөг нөлөө үзүүлж модны ургалтыг зогсоож байна.
Тус цэвэрлэгээнд нийслэлийн Байгаль орчны газрын албан хаагч, лам хуврагуудаас бүрдсэн 41 хүн оролцож, 3 хорооны 13 га орчим талбайгаас 5 портер хадаг, шашны эд хэрэглэлийг устгалд оруулж, цэвэрлэгээний ажлыг амжилттай зохион байгуулжээ.
Цаашид шашны зан үйл хийх, хадаг хэрэглэхтэй холбоотойгоор орчныг бохирдуулах, мод ургамлыг гэмтээхгүй байхыг иргэд сүсэгтэн олонд анхааруулж байна гэж нийслэлийн Байгаль орчны газраас мэдээллээ.