Засгийн газрын шинэ бондын хүү Хуралдайгийнхаас бага байна
Засгийн газар дахин шинэ бонд гаргаж магадгүй тухай “Өнөөдөр” сонин мэдээлжээ.
Монгол Улсын Засгийн газар ирэх оны нэгдүгээр сард Чингис бондын 500 сая ам.доллар, мөн оны тавдугаар сард Дим Сам бондын өрийг төлөх товтой. Тэгвэл гаднын зах зээлд гаргасан өмнөх бондуудыг дахин санхүүжүүлэх хүлээлттэй байгаа тухай албаны эх сурвалж мэдээлсэн гэнэ.
Манай Улсын хувьд 2012 онд гаргасан таван жилийн хугацаатай Чингис бондын хүү 4.124 хувьд тогтсон. Үүний дараа гурван жилийн хугацаатай гурван тэрбум юанийн Дим Сам бондыг 7.54 хувийн хүүтэй босгосон байдаг. Мөн синдакат зээл, Мазаалай бонд гэхчилэн олон улсаас босгосон зээл өсөн нэмэгдсэн юм. Хамгийн сүүлд Хуралдай бонд гаргаж, Хөгжлийн банкны 580 сая ам.долларын зээлийг дахин санхүүжүүлсэн. Хуралдай бондын хүү 8.75 хувьтай тэнцэж байсан юм.
Албаны эх сурвалжийн мэдээлж буйгаар энэ удаа гаргах бондын хүү Хуралдайгийнхаас бага байх хүлээлттэй байна.