1 мин

ЖҮДО: “Абу-Даби Их Дуулга” тэмцээн израиль бөхчүүдийг хавчин хяхлаа

Израилийн бөх түрүүлвэл Израилийн тугийг мандуулахгүй, сүлд дууг нь ч тавихгүй гэдгээ зохион байгуулагчид мэдээлсэн гэнэ.

М.Сугар-Эрдэнэ 2017.10.18 49 33 22

Энэ сарын 26-28-нд АНЭУ-ын Абу-Дабид жүдо бөхийн Их Дуулга тэмцээн болох гэж байгаа билээ. Тэмцээн эхлээгүй байгаа ч эхний маргаан шуугиан гараад байна.

“Тэмцээнийг зохион байгуулагчид Израилийн жүдогийн холбоонд тамирчдаа ISR гэсэн бичигтэй шигшээ багийнхаа хувцсыг өмсөж болохгүй гэж сануулсан байна” гэж vesty.co.il цахим хуудас мэдээллээ. Хэрэв Израилийн бөх алтан медаль хүртсэн тохиолдолд Израилийн тугийг мандуулахгүй, сүлд дууг нь ч тавихгүй гэдгээ зохион байгуулагчид мэдээлсэн гэнэ. Мөн сугалаа, тэмцээний явцыг гаргах тэмцээний албан ёсны сайтад израиль бөхчүүдийн ард улсых нь нэрийг бичихгүй аж.

Израилийн Соёл, спортын сайд Мири Регев энэ талаар Олон улсын жүдо бөхийн холбооны тэргүүн Мариус Визевт хандан, “Абу-Даби Их Дуулга” тэмцээнийг зохион байгуулагчдын энэ шийдвэрийг цуцлахыг шаардсан байна. Шаардлагад “Ямар ч тамирчны хувьд өөрийн улсын бэлгэ тэмдэгтэй өмсгөл өмсөх нь нэр төрийн хэрэг байдаг. Долоохон хоногийн өмнө Ташкентэд болсон Гран Прид манай Ори Сасон, Саги Муки хоёр түрүүлээд, эх орныхоо сүлд дуулал дор далбаа нь хэрхэн мандаж байгааг хараад баярлаж байсныг та бүхэн харсан. Абу-Дабид ч тийм байх ёстой” гэж дурджээ.
“Абу-Даби Их Дуулга” тэмцээнд Риогийн олимпийн хүрэл медальт Ори Сасон, Европын аварга Саги Муки, дэлхийн аваргын хүрэл медальт Таль Фликер тэргүүтэй Израилийн 12 жүдоч оролцох юм.

М.Сугар-Эрдэнэ 2017.10.18