2017 оны ХАМГИЙН ХҮЧИРХЭГ 100 ЭМЭГТЭЙГ нэрлэлээ
Форбес сэтгүүл 2017 оны “Хамгийн хүчирхэг 100 эмэгтэй”-г тодруулжээ.
Форбес сэтгүүл 2017 оны “Хамгийн хүчирхэг 100 эмэгтэй”-г тодруулжээ. Дэлхийд нэр нөлөөгөө дархлан, улс төр, шинжлэх ухаан, технологиос эхлээд урлаг соёл, спорт зэрэг бүхий л салбарт өөрчлөлт шинэчлэл авчирсан хатагтай нарыг уг жагсаалтад нэгтгэдэг. Эдгээр эмэгтэйчүүд манай гарагийн ирээдүйг залан, бидний амьдралд ч тодорхой нөлөөлөл үзүүлж байна. Энэ жилийн хувьд Германы канцлер Ангела Меркель 11 дэх удаагаа жагсаалтыг тэргүүллээ. Ерөнхийлөгчийн сонгуулиар ялагдал хүлээснээр нэр нөлөөгөө алдсан Хиллари Клинтон 2016 оны жагсаалтад 2-рт бичигдэж байсан бол энэ жил 63 байраар ухрав. Жагсаалтын эхний 10 байрт олон нийтийн төдийлөн таамаглаагүй бүсгүйчүүд нэмэгдсэн нь технологи, нийгмийн манлайллын салбар зонхилно. Ингээд дэлхийг гартаа атгасан ч гэж болох “ТОП-10 хүчирхэг эмэгтэйчүүд”-ийг танилцуулж байна.
10. Технологийн “чанга” хатагтай: Вирджиния Рометти
АНУ-ын компьютер технологийн тэргүүлэгч “IBM” компаний ерөнхий захирал Вирджиния Рометти 2014 оноос хойш жил бүр жагсаалтын эхний 10-т бичигдэж байна. Өдгөө 60 настай хатагтай 177 улсад салбартай, 106 жилийн түүхтэй компанийг амжилттай удирдсаар байгаа нь нэр нөлөөг нь батлах биз ээ.
9. Евро бүсийн тэргүүлэгч - Ана Патрисия Ботин
Евро бүсийн хамгийн том банкийн ерөнхий захирал, “Банко Сантандер” грүппийн өв залгамжлагч Ана Патрисия Ботин “Топ-10” жагсаалтад багтжээ. Гэр бүл нь 4 үе дамжин тус грүппийг удирдаж байна. 57 настай Ана Патрисия Ботин Харвардын Бизнесийн Их сургуулийг төгсмөгцөө “Кока Кола” компаний гүйцэтгэх захирлаар ажиллаж удалгүй Их Британийн Гадаад Харилцааны Яамны элч төлөөлөгч зэрэг “том” албан тушаал хашсан.
8. ОУВС тэргүүн - Кристина Лагард
Францийн сангийн сайд асан Кристин Лагард 2011 оноос ОУВС-гийн удирдагчаар ажиллаж байна. ОУВС-ийн тэргүүнийг европын орнуудаас сонгодог бөгөөд тэрээр 65 жилд сонгогдсон анхны эмэгтэй удирдагч болсон юм.
7. Бизнес хатагтай - Абигейл Жонсон
АНУ-ын хөрөнгө оруулалтын “Fidelity” корпорацийн ерөнхий захирал, бизнес эрхлэгч Абигейл Жонсон 7-р байрт бичигджээ. Тэр мөн дэлхийн хамгийн баян 10 эмэгтэйн нэгд тооцогддог. Сүүлийн жилүүдэд бэлгийн хүчирхийлэл, жендерийн тэгш эрхийн талаар хүчтэй байр суурь илэрхийлэх болсноор нэр нөлөөгөө тэлээд байна.
6. Youtube шинэчлэгч- Сьюзан Вожицки
2014 оноос видео бичлэгийн тэргүүлэгч сүлжээ “Youtube”-ийн гүйцэтгэх захирлаар ажиллаж буй Сьюзан Вожицки хүчирхэг эмэгтэйчүүдийн нэг боллоо. Түүний технологийн салбарт оруулсан нөлөөлөл бидний өдөр тутмын хэрэглээ болсон "Youtube" сүлжээнээс илт мэдрэгдэх биз ээ.
5. “General Motors” - Мэри Барра
“General Motors” корпорацийн ерөнхий захирал Мэри Барра автомашин үйлдвэрлэлийн салбарт амжилт олсон анхдагч эмэгтэйчүүдийн нэг юм. 17 настайдаа үйлчлэгч, цэвэрлэгчээр тус корпорацид ажиллаж эхэлсэн түүний намтар түүх тун эрэмгий. Тиймээс ч “General Motors”-ийн нүүр царайг огт өөр төвшинд гаргасаар байна.
4. Өөдөө тэмүүл -Шерил Сэндберг
Орчин үед хүн бүрийн хэрэглээ болсон фэйсбүүк нийгмийн сүлжээний үйл ажиллагаа хариуцсан гүйцэтгэх захирал Шерил Сэндбэрг бизнесийн ертөнцөд хэдийн танигджээ. 2012 оноос фэйсбүүкийн удирдах зөвлөлд багтсан. Эмэгтэйчүүдийн манлайлал, эрүүл аюулгүй нийгэмд амьдрах эрхийн төлөө тууштай тэмцэгч. Түүний “Өөдөө тэмүүл” /Lean in/ ном худалдаанд гарсан даруйдаа олон улсын бэстселлер болсон билээ.
3. Гейтсийн эрин үе- Мелинда Гейтс
Дэлхийг өөрчилсөн нөхөртэй учраас л тэр энэ жагсаалтад багтсангүй. “Билл энд Мелинда сан”-гийн дэд Ерөнхийлөгч хатагтай нөхрөөсөө дутахгүй нөлөөтэй болоод байна. Мелинда эмэгтэйчүүд, хүүхдийн эрхийн төлөө тууштай тэмцэгч төдийгүй чадварлаг энтрепренер. Сүүлийн 17 жилийн турш “Билл энд Мелинда сан” асар их өв хөрөнгийг боловсролын салбарт хөрөнгө оруулжээ.
2. Улс төрийн гол тоглогч- Тереза Мэй
Сүүлийн 10 жилийн турш тэргүүлэгчдийн нэг байсаар ирсэн Их Британийн Ерөнхий сайд Тереза Мэй "Хилари Клинтоны" дэд байрыг эзэллээ. Европын холбооноос гарснаас хойш олон улсад нэр хүндээ багагүй алдсан Их Британийн үйл ажиллагаа зогсох бус харин ч тогтворжлоо. Энэ бүхэнд “гол” нөлөөтэй Тереза Мэй улс төрийн том тоглогчдын нэг хэвээр байна.
1. Мэдээж “Төмөр хатагтай” - Ангела Меркель
12 жилийн турш Германы канцлераар ажиллаж буй Ангела Меркель 11 дэх удаагаа жагсаалтыг тэргүүллээ. Дэлхийн хамгийн хүчирхэг эмэгтэй төдийгүй нөлөө бүхий эрчүүдийг ч ардаа орхидог Төмөр хатагтайн байр суурь дархан цаазтай хэвээр үлджээ.