1 мин

Банкнаас бусад санхүүгийн салбарт өсөлт ажиглагджээ

Банкнаас бусад санхүүгийн зах зээлийн ерөнхий үзүүлэлтүүд салбар бүрээр өсжээ.

Э.Хулан 2017.11.13 45 28 6

Санхүүгийн зохицуулах хороо өнөөдөр хэвлэлийн бага хурал зарлаж, банкнаас бусад санхүүгийн салбарын энэ оны гуравдугаар улирлын санхүүгийн болон бусад статистик үзүүлэлтийг тоймлон мэдээллээ. Хэвлэлийн бага хурлыг тус хорооны Судалгаа, эрсдлийн шинжилгээний хэлтсийн дарга Н.Хүдэрчулуун удирдан явуулсан юм. Мөн Үнэт цаасны газрын дарга Б.Лхагвасүрэн, Даатгалын газрын дарга М.Өлзийбат, Банк бус санхүүгийн байгууллагын газрын дарга С.Баянцогт, Хадгаламж, зээлийн хоршооны газрын дарга Ц.Алтантуул, Хяналт шалгалт, зохицуулалтын газрын дарга Б.Ариунаа нар оролцов.

Банкнаас бусад санхүүгийн зах зээлийн ерөнхий үзүүлэлтүүд салбар бүрээр өсжээ. Тухайлбал, хөрөнгийн зах зээлийн үнэлгээг өмнөх оны мөн үетэй харьцуулахад 695.4 тэрбум төгрөгөөр өсөж 2 их наяд төгрөгт хүрсэн бол даатгалын салбарын нийт активын хэмжээ 251.7 тэрбум төгрөг болж өнгөрсөн оны мөн үеийнхээс 21.4 хувиар өссөн байна. Хадгаламж зээлийн хоршоодын нийт активын хэмжээ өмнөх оны мөн үеэс 31.2, өнгөрсөн улирлаас 10 хувиар тус бүр өссөн байна. Тэгвэл банк бус санхүүгийн байгууллагын нийт хөрөнгө өмнөх оны мөн үеэс 25.1 хувиар өсөж 906 тэрбум төгрөгт хүржээ. Түүнчлэн ББСБ-ын нийт зээлийн хэмжээ өмнөх онтой харьцуулахад 32.3 хувиар өсөж 592.4 тэрбум төгрөг болсон бөгөөд сарын жигнэсэн дундаж хүү 3.4 хувь болж өмнөх улирлынхаас 0.1 пүнктээр буурчээ.

Э.Хулан 2017.11.13