Ричард Гир Монголд бурхны шашны тухай кино хийхээр иржээ
"Хөөрхөн хүүхэн" киноны гол дүрүүд Монголд тун элэгтэй бололтой.
“Хөөрхөн хүүхэн” киноны гол дүр гэдгээр бидний сайн мэдэх, Холливүдийн нэрт жүжигчин, найруулагч Ричард Гир Монголд ирээд байна. Тэрээр бурхны шашны тухай шинэ уран бүтээл хийхээр төлөвлөж, судалгааны төвшинд явагдаж буйг холбогдох эх сурвалжууд мэдээллээ.
Өдгөө 68 настай алдарт жүжигчин “Алтан бөмбөрцөг” тэргүүтэй олон улсын 50 гаруй шагналд нэр дэвшиж, 21-т нь ялсан Холливудын домогт жүжигчдийн нэг. Өмнө нь 1996, 2010, 2014 онуудад гурван ч удаа Монголд ирж байсан.
Мөн Далай ламтай найрсаг харилцаатай байдгаараа олны анхаарлыг багагүй татдаг Ричард Гир 2010 оны есдүгээр сард “Монголын бурхан шашин” сэдэвт олон улсын анхдугаар бага хуралд оролцон, илтгэл танилцуулсан юм.
Монголд ирэх бүртээ тэрээр Монголын байгалийг биширч, кино бүтээх хүсэлтэйгээ илэрхийлж байсан ч энэ талаар тодорхой шийдвэрт хүрээгүй байсан. Харин энэ удаагийн айлчлалаар тодорхой бус асуулт шийдэгдэж байна. Монголд бүтээх шинэ уран бүтээл нь америк найзыгаа Монгол эх орондоо дагуулан ирж буй ламын тухай номноос сэдэвлэсэн бөгөөд Ричард Гир ерөнхий найруулагчаар ажиллах юм.