Өнөө шөнө МАН унтахгүй
МАН-ын их хурал “Монгол Ардын Намын дүрмийн шинэчлэл”, “Монгол Ардын Намын Хичээн эрмэлзэх зүйл, мөрийн хөтөлбөрийн шинэчлэл”, “XXVIII Их хурлаас гарах уриалга” гэсэн гурван сэдвээр салбар хуралдаанд хуваагдан хуралдаж байгаа бөгөөд хөтөлбөр ёсоор 17.00 цаг хүртэл үргэлжлэх юм. Ингээд төлөөлөгчид 18.00 цагт их хурлын хуралдаанд эргэн цуглах аж. Хөтөлбөрт өнөөдрийн эл хуралдааны дуусах цаг 00.00 хэмээснээс үзэхэд МАН-ын их хурал болж буй Соёлын төв өргөө өнөө шөнө “унтахгүй” бололтой.
Маргааш буюу МАН-ын XXVIII их хурлын хоёр дахь өдөр их хурлын төлөөлөгчид намын шинэ даргаа сонгоно. “Монгол Ардын Намын даргад нэр дэвшүүлэх санал хураах, тооллого явуулах, дүн гаргах” гэсэн хөтөлбөрийн заалт 08.00-13.30 цагт амжих учиртай. Тиймээс маргааш тодрох даргын нэрийг тодруулах “тусгай” ажиллагаа өнөө шөнийн гол үйл явдал болох магадлалтай.