Шуурхай: Ерөнхий сайд У.Хүрэлсүх МАН-ын даргаар тодорлоо
МАН-ын 28 дугаар их хурал үргэлжилж байна. Хурлаар намын даргын сунгаанд .Хүрэлсүх, УИХ дахь МАН-ын бүлгийн дарга Д.Хаянхярваа нар өрсөлдөхөөр болж, санал хураалт эхэлсэн. Ийнхүү 1300 төлөөлөгчийн дунд явуулсан санал хураалтад Монгол Улсын Ерөнхий сайд У.Хүрэлсүх ялалт байгуулсан мэдээ байна. Тэрбээр анх удаагаа энэ албыг хаших гэж байна.
У.Хүрэлсүх 63.1 хувийн саналаар ялалт байгуулсан бөгөөд УИХ-ын гишүүн Ж.Энхбаяр тэргүүтэй намын гишүүд өөрсдийн твиттерээр дамжуулан баяр хүргэж эхэлжээ.
2013 оны арваннэгдүгээр сараас хойш МАН-ын даргаар ажилласан М.Энхболд "Намын даргын алба бол эрх мэдэл, эзэн суудал гэхээс илүү асар их хариуцлага, амарч тайвшрахын аргагүй зүтгэл чармайлт, мөр дарж сэтгэл чилээсэн хүнд ачаа байдаг юм аа. Энэ удаад би Монгол Улсын Ерөнхийлөгчийн сонгуульд дэвшүүлсэн нам, гишүүдийнхээ даалгаврыг биелүүлж чадаагүйнхээ төлөө өөртөө хариуцлага ногдуулж байна" гэж хэлээд үүрэгт ажлаа өгсөн юм.