Д.Амарбаясгаланг генсекээр үлдээх үү
МАН-ын XXVIII их хурлын төлөөлөгчид намын шинэ дүрмийн дагуу Бага хурлын 369 гишүүнээ сонгох бас нэгэн сонгуультай золгосноор гурав дахь өдрийн хуралдаанаа эхлүүллээ.
Шинэ дүрмээр Бага хурлын гишүүдийн тоог нэмж 369 болгосон бөгөөд үүний 30 хувийг эмэгтэйчүүд, 30 хувийг нь намын анхан шатны байгууллагаас бүрдүүлэхээр болсон байна. Үүний өмнө 2013 онд хийсэн шинэчлэлээр Бага хурлын гишүүдийн тоог 310 байхаар баталж байсан бол түүний өмнө 400 байжээ.
МАН-ын XXVIII их хурлаас сонгогдох Бага хурал бүрдмэгц шинэ бүрэлдэхүүн анхны хуралдаанаа хийж, МАН-ын ерөнхий нарийн бичгийн даргыг сонгох юм байна. Ерөнхий нарийн бичгийн даргад одоогийн генсек Д.Амарбаясгалан, нарийн бичгийн дарга Ц.Бат-Энх, Сүхбаатар дүүргийн Засаг дарга асан Б.Баярмагнай, НИТХ-ын төлөөлөгч С.Мөнхчулуун, эмэгтэй квотыг төлөөлж Эрүүл мэндийн дэд сайд асан Ж.Цолмон нар өрсөлдөх тухай мэдээлэл бий. Баттай эх сурвалжийн өгүүлж буйгаар, Д.Амарбаясгалан МАН-ын ерөнхий нарийн бичгийн даргын албаа үргэлжлүүлэн хаших хамгийн өндөр магадлалтай аж. МАН-ын шинэ дарга У.Хүрэлсүх нарын генсек дээр хийсэн тохироо Д.Амарбаясгалан бол түүнтэй өрсөлдүүлэх хотын фракцын төлөөлөл нь Б.Баярмагнай юм.