Робиньо хүчингийн хэргээр 9 жилийн ял сонсов
33 настай Робиньогийн хувьд хүчингийн хэрэгт сэжиглэгдэж байгаа анхны тохиолдол энэ биш.
Италиас ирсэн энэ мэдээ хөлбөмбөг сонирхогчдыг шоконд оруулсан нь лавтай. Милан хотын шүүхээс Бразилийн шигшээ багийн тоглогч асан Робиньод хүчингийн хэргээр 9 жилийн ял өгсөн байна.
Робиньо таван найзын хамт 2013 оны нэгдүгээр сарын 22-нд Милан хотын нэгэн дискон дээр 22 настай албани бүсгүйг хүчиндсэн хэрэгт буруутгагдаад байсан юм. 33 настай Робиньогийн хувьд хүчингийн хэрэгт сэжиглэгдэж байгаа анхны тохиолдол энэ биш. 2009 онд Английн “Манчестер Сити”-д тоглож байхдаа мөн ийм хэргээр баривчлагдсан ч цагаадаж байсан юм.
Одоо Робиньо Бразилийн "Атлетико Минейро” багт тоглож байгаа тул хорих ял үйлчилж эхлээгүй байгаа. Түүний өмгөөлөгч Мариса Алия шүүхийн шийдвэрийг давж заалдахаа мэдэгджээ.