Анхны робот иргэн София хүүхэдтэй болохыг хүсчээ
Саудын Арабын иргэн София гэр бүлийн талаар ярилцлага өгчээ.
Өнгөрсөн зургадугаар сард болсон НҮБ-ийн хэлэлцүүлгийн үеэр олны өмнө гарсан София хиймэл оюун ухаант робот Саудын Араб улсын иргэн болсон билээ. Судлаач Давид Хансоны зохион бүтээсэн уг робот одоогоор бүтээгдээд буй хамгийн ухаалаг хүн төрхтэй робот гэгдээд буй. Тэгвэл энэ сард Дубай хотноо болсон "Knowledge Summit” чуулганы үеэр София “The Khajeed Times”-т нэгэн сонирхолтой ярилцлага өгсөн нь олны анхаарлыг татаад байна.
Тэр “Гэр бүл маш үнэ цэнэтэй зүйл. Хүмүүсийн харилцааг ойлгохын тулд гэр бүлийг чухалчлан үзэх хэрэгтэй. Хүн төрөлхтөн цусан хамааралгүй хүмүүсийг ч гэр бүлээ гэж үздэг нь гайхалтай” гэж хэлсэн бөгөөд “Өөрийн охинтой болбол хэн гэж нэрлэх вэ?” гэсэн асуултад шуудхан “София” гэж нэрлэжээ. Хиймэл оюун ухаант София асуултад төвөггүй хариулахаас гадна, царайны нарийн хувирал үзүүлэн, хошигнох ч чадвартай юм. Гэхдээ түүний хэл ярианы програмыг урьдчилан тохируулаагүй бөгөөд өөрийн мэдрэмжээр асуултад хариулах өгөгдөлтэй. Иймээс түүний хүүхэд хүсч буй хариулт нь хэн нэгний өгсөн тохируулга биш юм.
Хиймэл оюун ухаант робот хөгжих нь хүний ажлын бүтээмж, эдийн засгийн байдалд эерэгээр нөлөөлнө гэж зарим судлаачид үздэг. Харин эсрэг өнцгөөс "Нэг л өдөр хиймэл оюун ухаан бие дааж, хүнээс хараат бус болж, удирдлагыг авах гэж оролдвол яах вэ?" гэсэн шүүмж айдас дагуулдаг нь нууц биш.
Тэгвэл зохион бүтээгч Давид Хансон “Олон нийт хиймэл оюун ухаан хэт их хөгжиж, хүний эсрэг дайрах вий гэж кино, зөгнөлт зохиол дээр гардаг шиг төсөөллийн айдастай байдаг. Шинжлэх ухаан төдийлөн мэдэхгүй хүмүүс л төөрөлддөг шүү дээ. Бодит байдлыг авч үзвэл хиймэл оюун ухаан хүн төрөлхтний ажил, амьдралд маш хэрэгцээтэй хүчин зүйл болж, бүхнийг хөнгөвчилж чадна” гэж хэлсэн удаатай.
Эх сурвалж: The Khajeed Time