Олон улсын дуурийн дуучдын уралдаанд Ч.Бадрал түрүүллээ
Мөн манай дуучин Т.Энхбат 3-р байрт шалгарсан юм.
ОХУ-ын Петербургийн консерваторид 11 дүгээр сарын 24-нөөс 12 дугаар сарын 2-нд олон улсын дуурийн дуучдын “Санкт-Петербург” уралдаан болж өнгөрлөө. Дэлхийн 15 орны 200 дуучин оролцсон тус уралдааны хоёрдугаар шатанд 48 дуучин шалгаран үлдсэний дотор манай хоёр дуучин байсан.
Ингээд уралдааны тэргүүн байрын шагналыг зарлахад манай баритон Цэргийн дуу, бүжгийн эрдмийн чуулгын дуучин Ч.Бадрал, Узбекистаны тенор Бехзод Давронов нар тэргүүн байрыг хуваан эзэллээ.
Шүүгчдийн бүрэлдэхүүнд ажилласан ОХУ-ын Ардын жүжигчин Сергей Лейферкус “Хоёр дуучин эхний байрт шалгарсан нь тун ховор тохиолдол боллоо. Финалын тайз Ч.Бадралын хувьд ёстой оргил үе нь байлаа. Тун содон баргил хоолой” хэмээн үнэлжээ. Мөн манай дуучин Т.Энхбат 3-р байрт шалгарсан юм. Энэ жил болсон Н.А.Римский-Корсаковын нэрэмжит залуу дуурийн дуу дуулаачдын Олон улсын уралдаанд Ч.Бадрал 2-р байр, Санктпетербургийн хөгжмийн дээд сургуулийн магистрант Т.Энхбат гуравугаар байр шалгарч байв.
1-р байр
Бехзод ДАВРОНОВ тенор (Узбекистан, Самарканд)
Ч.Бадрал баритон (Монгол, Улаанбаатар)
2-р байр
Станислав ЛИ баритон (ОХУ, Москва)
Юлия ЛЮБИМОВА сопрано (ОХУ, Санкт-Петербург)
3-р байр
Ксения ГАЛИЦКАЯ сопрано (ОХУ, Архангельск)
Т.Энхбат баритон (Монгол, Улаанбаатар)
Даниил ЧЕСНОКОВ бас (ОХУ, Москва)
Екатерина ЯСИНСКАЯ сопрано (ОХУ, Москва)