Эд Шираны тоглолтын тасалбарыг “шагласан” хүнийг хорьжээ
51 ам.долларын тасалбарыг 2000 ам.доллараар худалдаалжээ.
Их Британийн дуучин Эд Ширан энэ сард Лондон, Нью-Йорк, Калифорни, Лос Анжелест тоглолтоо хийсэн. Тэгвэл түүний тоглолтын тасалбарыг үнэ өсгөн худалдаалсан Шинэ Зеландын иргэн 60 настай Бритон гэх эрийг эрэн сурвалжилсны эцэст хорих арга хэмжээ авчээ.
Тоглолтын тасалбар дунджаар 51 ам.доллар байсан бол хэрэгтэн 2000 ам.доллараар хэд хэдэн хүнд худалдаалсан нь тогтоогджээ. Бритоноос гадна Шинэ Зеландын хоёр иргэн хуурамч тасалбар үйлдсэн ч худалдаанд гаргахаасаа өмнө Цагдаагийн ажилтанд баригдан их хэмжээний мөнгөөр торгуулсан байна.
Эд Ширан энэ талаар "Шүтэн бишрэгчдэд минь өндөр үнэ тулган, худалдаалсанд бухимдалтай байна. Дараагийн тоглолтын үеэр аюулгүй байдлыг анхааран ажиллахаа амлаж, хүлцэл өчиж байна" хэмээн мэдэгджээ.
Эх сурвалж: BBC