Чөлөөт бөх: Турк улс Ираны шигшээд Дэлхийн Цомын эрхээ өглөө
Яагаад туркчууд татгалзсан талаар албан мэдээ байхгүй байна.
Энэ хавар буюу дөрөвдүгээр сарын 7-8-нд АНУ-д болох чөлөөт бөхийн Дэлхийн Цомын тэмцээний оролцогч нарын дунд өөрчлөлт гарлаа. Дэлхийн Цомд сүүлийн ДАШТ-д нийлбэр дүнгээр 1-8-р байрт шалгарсан багууд оролцдог уламжлалтай. 2017 онд Парист болсон ДАШТ-ий эхний наймд АНУ, ОХУ, Гүрж, Турк, Азербайжан, Япон, Куба, Казахстан улсын багууд шалгарсан. Харин Ираны эрэгтэйчүүдийн шигшээ баг 9-р байрт орж, 2008 оноос хойш анх удаагаа Дэлхийн Цомын эрхгүй хоцорсон билээ.
Ираны шигшээ баг Дэлхийн Цомд сүүлийн 6 жил дараалан түрүүлээд байсан юм. Хүчирхэг өрсөлдөгч алга боллоо гэж баярлаж байсан баг олон байсан ч Ираны шигшээ баг ямар ч гэсэн тэмцээнд оролцох болжээ. Учир нь Туркийн шигшээ баг оролцохоос татгалзсан тул тэдний оронд ДАШТ-д 9-р байр эзэлсэн Ираны баг автоматаар сонгогдож байгаа юм. Яагаад туркчууд татгалзсан талаар албан мэдээ байхгүй байна. Гуравдугаар сарын 17-18-нд Японд болох эмэгтэйчүүдийн Дэлхийн Цомд ч туркчууд орохгүй байж магадгүй. Тэгвэл Парист 9-р байр эзэлсэн Шведийн баг Дэлхийн Цомд орох болно.
Дэлхийн Цомд хамгийн олон түрүүлсэн баг
Эрэгтэй
ЗХУ 15
АНУ 13
Иран 8
ОХУ 6
Азербайжан 2
Куба 1
Эмэгтэй
Япон 9
Хятад 6
Америк 1
Монгол улс эрэгтэй Дэлхийн цомд 1975 онд мөнгө, 1981 онд хүрэл, 1987 онд мөнгөн медаль хүртэж байсан юм. Харин эмэгтэйчүүд 2013 онд мөнгө, 2015, 2017 онд хүрэл медаль авч байв.