2 мин

Залхуучуудад зориулсан иог: Таныг аз жаргалтай болгох 7 хөдөлгөөн

Ихэнх дасгалыг хийхийн тулд та буйдан дээрээсээ өндийх ч шаардлагагүй.

О.Анхзаяа 2018.01.08 1

230

Дасгал хөдөлгөөн хийх гэхээр нэг л болж өгөхгүй байна уу? Уг нь хүсэл байгаад байдаг ч хийж эхэлдэггүй, эсвэл эхлүүлээд л больдог бол танд энэ дасгалууд маш их таалагдана.

1. “Surya Bheda” (Хамрын нэг нүхээр амьсгалах)

• Тухтай байрлалд сууна уу.
• Нүдээ аниад зүүн гараа өвдөг дээрээ байрлуулж, эрхий болон долоовор хуруугаа бясалгалын үеийнх шиг нийлүүлнэ. Харин баруун гарынхаа дунд болон долоовор хурууг зурган дээр үзүүлсэн байдлаар хамар дээрээ аваачаарай.
• Зүүн хамрын нүхээрээ гүн амьсгал авч, хэсэг хором барих хэрэгтэй. Үүний дараа баруун гараараа зүүн хамрын нүхээ таглан баруун хамрын нүхээр амьсгалыг гаргана.
• Цааш баруун болон зүүн гэж ээлжлэн хийх хэрэгтэй. 2 минут орчим энэ дасгалыг хийхэд болно.

2. Dolasana

• Хөлөндөө мөрний хэмжээтэй зай авч гараа ардаа авч зогсоно.
• Урт амьсгаа авч, гараа өргөн толгойнхоо ард талаас барин зогсоно.
• Амьсгаагаа гаргаж, энэ мөчид доош тонгойно. Гараа салгаж болохгүй.
• Хоёр тийш ээлжлэн тонгойхдоо духаа өвдгөндөө маш сайн ойртуулах хэрэгтэй. Ер нь бол духаараа өвдгөө цохиж байсан ч буруудахгүй.
• Буцаад зогсоо байрлалд орно. Уг дасгалыг хэд хэдэн удаа давтан хийгээрэй.

3. Vajrasana (Очир эрдэнэ байрлал)

• Өвдгөө нугалан сууна уу. Өгзөг тань таны хөл дээр байрлах учиртай.
• Ийнхүү цэх байрлалтайгаар нэг минут сууна.

4. “Padmasana” (Бадамлянхуа байрлал)

• Хөлөө жийж сууна. Бид яг одоо завилах хөдөлгөөнийг хийх гэж байна.
• Эхлээд баруун хөлөө нугалан зүүн ташааныхаа орчим байрлуулна.
• Дараа нь зүүн хөлөө нөгөө тал дээрээ мөн аваачих хэрэгтэй. Завилан суусныхаа дараа эрхий болон долоовор хуруугаа нийлүүлэн суугаарай.
• Нүдээ анин, удаанаар амьсгалаа мэдэрч хэдэн минутын турш ийн сууна.

5. “Simha Garjana” (Архирч буй арслангийн байрлал)

• Хөлөө нугалан дороо хийж сууна.
• Нуруу цэх байж, өвдгөө салгах хэрэгтэй.
• Гарын алгаа өвдгөн дээрээ тавьж, булчингуудаа суллах хэрэгтэй.
• Амаа ангайж, эрүүгээ суллана. Хэлээ гаргах хэрэгтэйг мартаж болохгүй.
• Хамар болон амаараа амьсгал авна.
• Хоёр минут орчим хийнэ.

6. Sarpasana (Могойн байрлал)

• Доошоо харж хэвтэнэ. Энэ үед хөлөө нийлүүлсэн байх хэрэгтэй.
• Гараа нурууныхаа ард атган барьж, эрүүгээрээ газар тулна.
• Амьсгаа авч цээжээ дээш өргөн урагш ширтэнэ.
• Таны гарыг ардаас тань татаж байна гэж төсөөлөх хэрэгтэй.
• Байрлалаа чадахаараа хадгалан, амьсгалаа авч гаргана.
• Болиод, хэсэг хором завсарлаж дахин хийж эхэлнэ.

7. Shavasana (Цогцос гэх нэртэй байрлал)

• Энэ бол залхуу хүмүүсийн хамгийн дуртай байрлал.
• Дээш харан хэвтэх ба хөл ба гараа салган аль болох чөлөөтэй, тайван хэвтэнэ.
• Хөлөө аль болох салган, алцайж хэвтэх хэрэгтэй.
• Урт амьсгал авч, гарган тайвшрах шаардлагатай. Бүх булчингаа суллан тайвшир. 

 Эх сурвалж: Guardian.com

О.Анхзаяа 2018.01.08

230