Үра макүшитад унана
Сайн эдгээгүй байж барилдсаны гор гарч, энэ удаад зүүн өвдгөө гэмтээсэн байгаа.
Уран барилдаанаараа алдартай Кисэ дэвжээний бөх Үра өнгөрсөн жилийн 11 дүгээр сарын тэмцээний дараа баруун өвдгөндөө мэс засал хийлгэсэн тул Хацү башёд зодоглохгүй болжээ. Одоо жюүрёо зиндааны зүүний 11-т эрэмблэгдэж байгаа тул гуравдугаар сарын Хаврын тэмцээнд макүшитад буух нь тодорхой боллоо. Энэ жилийн сүмогийн ертөнцийн гол баатрын нэг болон тодорч байсан Үра Нагоя башёд баруун өвдгөө гэмтээн тэмцээний голоос гарсан ч гэмтлээ эдгээж амжилгүй есдүгээр сарын тэмцээнд барилдсан. Аки башёд дахин гэмтээд 11 сарын башёг бүрэн өнжиж, жюүрёод унасан юм. Сайн эдгээгүй байж барилдсаны гор гарч, энэ удаад зүүн өвдгөө гэмтээсэн байгаа. Бөх хүний амин сүнс болсон өвдгөө гэмтээсэн тул энэ удаад ояката нь бүрэн эдгэтэл нь дохёд гаргахгүй гэж шийджээ. Үнэхээр ч зодог тайлах эсэх нь шийдэгдэх хүнд цаг үе түүний хувьд тулаад байна.
2015 оны хавар мэргэжлийн сүмод орсон Үра нэг жилийн дараа жюүрёод дэвшсэн. Багаасаа чөлөөт бөхөөр хичээллэж байсан тул олон янзын мэхний хувилбартай. Гол нь эцсээ хүртэл тэмцдэг чанар нь түүнийг сүмогийн хамгийн нэр хүндтэй бөхчүүүдийн нэг болгосон юм. 173 см өндөр, 135 кг жижигхэн биетэй тул гэмтэл ихтэй. 2016 онд баруун шагай нь цуурч, зүүн гараа хугалж байлаа.