1 мин

12 жилийн өмнө алга болсон нохой эзэнтэйгээ эргэн уулзжээ

Б.Саруул 2019.10.14 11 6 1

418

12 жилийн өмнө алдагдсан фокстерьер үүлдрийн нохой эзэнтэйгээ эргэж уулзсан азтай басхүү ховор тохиолдол АНУ-д гарчээ. Датчесс 2007 оны хоёрдугаар сард Флорида дахь гэрийнхээ хашаанаас алга болохдоо дөнгөж гөлөг байсан аж. Харин Катерин Стрэнг өнгөрсөн долоо хоногт нохойгоо Питсбург хотын амьтдыг хамгаалах төвд байгааг олж мэдсэнээр эзэн, нохой хоёр эргэн уулзжээ. 

Өлсөж, сульдсан Датчессийг Питсбург хотын гудамжинд явж байхад нэгэн хүн олж улмаар амьтдыг хамгаалах төвд хүргэж өгсөн гэнэ. Төвийнхөн Датчессийн хүзүүнд байсан чипийг уншуулж үзэхэд Өмнөд Флоридад амьдардаг Катерин Стрэнгийн нэр дээр бүртгэлтэй болох нь гарч иржээ. Стрэнг нохойгоо алдсанаас хойш бичил чипний жилийн төлбөр болох 15 долларыг тасралтгүй төлж, хэзээ нэгэн цагт Датчесс олдоно гэдэгт итгэсээр байжээ. 

Энэ тухай тэрбээр "Нохойгоо эргэж олсондоо маш их баяртай байна. Датчессийг алга болсны дараа олон шөнө уйлж хоносон доо. Түүнийг алга болдог өдөр би ажил дээрээ байсан юм. 12 настай хүү маань сургуулиасаа дөнгөж ирээд санамсаргүй гэрийн хаалгыг онгойлготол Датчесс гараад явчихсан юм билээ. Тэрнээс хойш нохойгоо дахиж хараагүй. Гэсэн ч би итгэл найдвараа алдалгүй чипний төлбөрийг төлсөөр байсан" хэмээжээ. 

Харин Датчесс өнгөрсөн хугацаанд хаана амьдарч, хэрхэн аврагдсан нь тодорхойгүй байгаа аж. 

Эх сурвалж: CBS News

Б.Саруул 2019.10.14

418