Роналдиньо зодог тайллаа
Роналдиньо албан ёсны тоглолтод 2015 оноос хойш гараагүй ч зодог тайлаагүй хэвээр байсан юм.
Бразилийн алдарт хөлбөмбөгч Роналдиньо энэ сарын 16-нд албан ёсоор зодог тайлжээ. Түүний ах Роберто де Ассис “Globo Esporte”-д ярилцлага өгөхдөө “Ронни зодог тайлсан. Энэ жилийн ДАШТ-ий дараа бид сайхан арга хэмжээ зохион байгуулах болно. Европ, Ази, Бразилид хэд хэдэн ёслол хийнэ. Мэдээж Бразилийн шигшээ багийн тоглолт ч болно” гэж ярьсан байна.
Роналдиньо албан ёсны тоглолтод 2015 оноос хойш гараагүй ч зодог тайлаагүй хэвээр байсан юм. Тэрбээр “Флуминенсе”, “Керетаро”, “Атлетико Минейро”, “Фламенго”, “Милан”, “Барселона”, “ПСЖ”, “Гремио” багуудад нийт 513 тоглолтод оролцож, 190 бөмбөг оруулж байлаа. “Барса”-д Испанийн хошой аварга болж, Аваргуудын лигт түрүүлж, “Милан”-д байхдаа Италийн аварга болж байлаа. Гэхдээ түүний хамгийн том амжилт бол дэлхийн аварга. Ронни 2002 онд Бразилийн шигшээ багтай хамт дэлхийд тэргүүлж байлаа.
2005 оны Европын шилдэг хөлбөмбөгч, ФИФА-гийн оны шилдэг тоглогчоор 2004, 2005 онд шалгарч байв.