Н.Назарбаев АНУ-тай $2,5 тэрбумын гэрээ байгууллаа
Казахстаны Ерөнхийлөгч Нурсултан Назарбаев АНУ-д айлчилж байна.
Казахстаны Ерөнхийлөгч Нурсултан Назарбаев АНУ-д айлчилж байна. Айлчлалын дүнд Казахстан нийт 2.5 тэрбум долларын америк бараа, үйлчилгээ худалдан авахаар боллоо гэж Төрийн Департамент мэдээллээ. Мэдэгдэлд “Маш олон гэрээ хэлэлцээр байгуулсны дотор Boeing Company, GE Transportation, GE Digital, Chevron, Air Astana, KazTemirZholy, SCAT Airlines компаниуд болон Үндэсний баялгийн "Самрук-Казына" сангийн хооронд 2.5 тэрбум долларын гэрээ байгуулсан. Казахстан улстай бид Дэлхийн худалдааны байгууллагын хүрээнд хамтран ажиллагаагаа үргэлжлүүлнэ. 2016 онд хоёр улсын худалдааны хэмжээ 1.9 тэрбум долларт хүрсэн” гэж дурджээ.
Харин Казахстаны Ерөнхийлөгчийн хэвлэл мэдээллийн албанаас “Хөрөнгө оруулалт, худалдаа-эдийн засгийн чиглэлээр нийт 20 гаруй гэрээ байгуулсан. Сансар судлал, нефть хими, хөдөө аж ахуй, дэд бүтцийн салбарт 7 тэрбум долларын хөрөнгө оруулах болсон” гэж мэдэгдсэн юм.