Хятадын биткоин олборлогчид Орос руу нүүх үү
Оросын цахилгаан станцын хүчин чадал өндөр, Алс Дорнод зэрэг хүн ам цөөн, зах хязгаар нутагт илүүдэл эрчим хүч ихтэй.
Хятадын Ардын банкнаас криптовалют олборлогч майнинг компаниудыг аажмаар хаахыг орон нутгийн удирдлагуудад сануулаад байгаа. Учир нь олборлолтод маш их эрчим хүч зарцуулж байгаа юм.
Одоогийн байдлаар Хятадын майнинг компани, үйлдвэрийн ихэнх нь хүн ам цөөн, сэрүүн уур амьсгалтай Уйгар, Өвөрмонгол, Сычуань, Юньнань мужуудад төвлөрөн үйл ажиллагаа явуулж байна. Гэвч сүүлийн үед тэдний эрчим хүчний зарцуулалтын уршгаар энгийн айл өрхүүдэд ч цахилгааны доголдол гарч эхэлсэн юм. Тиймээс засгийн газраас тэдэнд олгож байсан эрчим хүчний хөнгөлөлтөө цуцалж эхлээд байна.
Эрчим хүчээ таслуулсан Хятадын биткоин олборлогчид гадаадад тэр дундаа ОХУ-д их хэмжээгээр гарах болов уу гэж шинжээчид үзэж байна. Оросын цахилгаан станцын хүчин чадал өндөр, Алс Дорнод зэрэг хүн ам цөөн, зах хязгаар нутагт илүүдэл эрчим хүч ихтэй. “Энэ эрчим хүчийг криптовалют олборлолтод чиглүүлж болох юм” гэж Алс Дорнод дахь ОХУ-ын Ерөнхийлөгчийн төлөөлөгч Юрий Трутнев ярьж байна. Мөн “Хятадууд Орост майнинг компани байгуулахад ямар ч асуудал байхгүй. Оросын цахилгаан станцууд хамгийн ачаалалтай үедээ ч хүчин чадлынхаа 40 хувийг л ашигладаг” гэж хэлжээ.
Оросын бизнес эрхлэгчид ч биткоин олборлолтод анхаарал хандуулж эхлээд байгаа. Саяхан нэгэн компани энэ зорилгоор Удмурт, Пермьд цахилгаан станц худалдан авсан байна.