Ерөнхийлөгчийн хэлсэн үгнээс болж, Литва Монголд хориг тавьсан худал мэдээ цацагджээ
Монголын барааг Литвад оруулахгүй, литва бизнес эрхлэгчдэд Монголтой ямар нэг худалдаа хийхгүй байхыг анхааруулсан гэж бичжээ.
Гадаадын цахим сүлжээнд “Литва улс Монголд эдийн засгийн хориг арга хэмжээ авлаа” гэсэн худлаа мэдээлэл цацагджээ. Хориг тавьсан шалтгаан нь манай Ерөнхийлөгч Х.Баттулгын хэлсэн үг аж.
Литва улсын дипломатууд энэ мэдээг няцааж, “Манай хоёр улсыг муудалцуулах, Литваг олон улсын тавцанд ганцаардуулах гэсэн хорон санаа байна. Монгол Литвагийн харилцаа тун сайн, бат бэх. Ямар ч хориг арга хэмжээ бид аваагүй. Монголын талд ч энэ талаар мэдэгдэл явуулсан байгаа” гэж мэдэгдлээ.
Худлаа мэдээлэлд “Монголын Ерөнхийлөгч Х.Баттулга Дархан хотод ЗХУ-ын дайчдад зориулсан хөшөөний дэргэд Зөвлөлтийн арми Балтийн улсуудыг фашист Германаас чөлөөлсөн гэж хэлсний хариуд Литва улсын Ерөнхийлөгч Даля Грибаускайте эдийн засгийн хориг арга хэмжээ авсан. Монголын барааг Литвад оруулахгүй, литва бизнес эрхлэгчдэд Монголтой ямар нэг худалдаа хийхгүй байхыг анхааруулж, саяхнаас яригдаж эхэлсэн Вильнюс –Улаанбаатар алсын галт тэрэгний төслийг зогсоохыг тушаасан” гэж бичсэн байжээ.