Хэт их агаарын бохирдлын улмаас салхин шуурга үүсч болзошгүй
Туршилтаар агаар дахь бичил хэмжээний хорт бодис салхин шуургыг 50 хувиар нэмэгдүүлсэн байна.
Агаарт агуулагдах хэт нарийн ширхэгт тоосонцрын хэмжээ маш бага байлаа ч онц аюулт хэмжээний агаарын урсгал бий болгож байдгийг АНУ-ын эрдэмтэд шинэ судалгаагаар нотолжээ. Ингэхдээ Амазоны ширэнгэн ойд үүсдэг хүчтэй шуурганаас ч аюултай төвшинд нөлөөлж магадгүй аж. “Номхон Далайн Үндэсний Судалгааны хүрээлэн”-гийн шинжилгээний үеэр загвар туршилт явуулахад агаар дахь бичил хэмжээний хорт бодис салхин шуургыг 50 хувиар нэмэгдүүлсэн байна.
“Ултрафини аэросил” буюу агаар дахь хэт нарийн ширхэгт тоосонцор нь эрчим хүчний станцуудаас эхлээд автомашин, түймрийн утаа, хэвлэгч хорт бодисоос хүртэл ялгардаг аж.
“Би хорт тоосонцрын агаарын урсгал дахь нөлөөллийн талаар 10 гаруй жил судалж байгаа ч энэ удаагийнх шиг том хүрээнд нөлөөлөл үзүүлж байгааг анх удаа харж байна” гэж судалгааны багын ахлагч, “Номхон Далайн Үндэсний Судалгааны хүрээлэн”-гийн судлаач, доктор Жи Вень Фань мэдэгджээ.
2014 онд танилцуулсан агаарын температур, салхи, усны уурын нөхцөл, агаар мандлын шуурга болон бохирдлын тухай судалгааны үр дүнд үүлэн дусал үүсэх явцдаа дулааныг нэмэгдүүлж, салхи шуургыг эрчимжүүлж байдгийг тогтоосон байна.
Авто тээврийн утаанд явуулсан судалгаа ёсоор хэт нарийн ширхэгтэй тоосонцор шуурганд нөлөөлөх боломжтой гэж Вашингтоны Их Сургуулийн агаар мандал судлаач Жоэль Торнтон үзжээ. Судалгааны дараагийн шатанд агаар дахь хорт бодис цаг агаарын нөхцөл байдал, салхи, температур зэрэг хүчин зүйлст хэрхэн харилцан үйлчилж, нөлөөлөхийг дэлгэрүүлэн судлахаар төлөвлөж байгаа аж.
Эх сурвалж: www.sciencenews.org
Бэлтгэсэн: Б.Мөнхбайгаль