“Уншдаг мэт” харагдахад тань туслах 10 ном
“Ном уншина” гэж үргэлж боддог ч хичээл, ажил, гэр бүл гэсээр завдахгүй байна уу?
“Ном уншина” гэж үргэлж боддог ч хичээл, ажил, гэр бүл гэсээр завдахгүй байна уу? Ном уншдаг хүнтэй яриа өрнүүлэх гэхээр нэг л бэрхшээлтэй санагддаг уу? Тэгвэл та дараах номуудыг уншсан байхад ямар ч ном уншдаг хүнтэй чөлөөтэй яриа өрнүүлж чадахаас гадна байнга ном унших зуршлыг ч өөртөө төлөвшүүлж болох юм.
1. “Дэлхийн сонгомол өгүүллэг”, “Дэлхийн сонгомол яруу найраг” Л.Өлзийтөгс, Г.Аюурзана
Монгол болон гадаадын өгүүллэг, яруу найргийн антологи бүхий цувралыг уншсан байхад та алдартай зохиолчид, утга зохиол, яруу найргийн суурь мэдлэгтэй болно.
2. “Цаг хугацааны товч түүх” Стивен Хоукинг
Шинжлэх ухааны төрлөөс нэн тэргүүнд унших бүтээл. Орчлон ертөнцийн талаар бид хэрхэн төсөөлдөг вэ? Дэлхий яагаад байдаг вэ? зэрэг шинжлэх ухааны түүх, хүн төрөлхтний чухал онолуудын талаарх тун цэгцтэй бичигдсэн ном.
3. "Анна Каренина" Лев Толстой
“Залуу хүн бүрийн заавал унших бүтээл”-ийн тэргүүн байрт бичигддэг роман. Нилээдгүй зузаан хэмжээтэй ч утга агуулгаараа үеийн үед байлдан дагуулсаар буй. Дэлхийн сонгодог романы жишээ болгон нэн тэргүүнд “Анна Каренина”-г уншаарай.
4. Харүки Мүракамигийн ном
Орчин цагийн хамгийн алдартай хүүрнэл зохиолын мастерийн ямар нэг номыг нэн даруй уншаарай. Түүний “Норвегийн ой”, “1Q84”, “Өнгөгүй Тазаки Цүкүрү ба түүний эргэлийн он жилүүд” зэрэг бүтээлүүд нь хамгийн алдартай.
5. “Өндөр бүтээмжтэй хүний 7 дадал”
Харвардын Их сургуулийн профессор Стивен Ковейны энэхүү ном хүний өдөр тутмын амьдралд тохиодог энгийн зүйлс ч амжилтанд хүргэх түлхүүр болдог талаар өргөн хүрээний мэдлэг олгоно. Уг ном танд төдийлөн итгэмжгүй санагдвал өөрийн сонголтоор хувь хүний хөгжлийн ном уншихыг зөвлөж байна.
6. “Хөх тэнгэр” Ч.Галсан
Дэлхийн утга зохиолын газрын зурагт Монгол улс Чинагийн Галсан гуайн “Хөх тэнгэр” романаар нэрлэгдсэн. 1994 онд бичигдсэн уг роман гадаад хэл дээр хэвлэгдсэн төдийгүй дэлхий нийтэд “Монголын нэрийн хуудас” гэгдээд байна.
7. “Дэлхий бөөрөнхий биш” Томас Л.Фрийдман
30 гаруй хэлээр орчуулагдаж, олон сая хувь борлогдоод буй бүтээл. Зохиогч нь гурван ч удаа нэрт Пулитцерийн шагналыг хүртсэн.
8. Р. Чойном “Сүмтэй бударын чулуу”
Монгол Улсын төрийн соёрхолт яруу найрагч Р.Чойномын шүлэг, найраглалын бүтээл.
9. “Сонгомол Эсээнүүд” Мишель Монтень
Хүний оршихуйн олон талт байдал, амьдралын үзэгдлийг шингээсэн 35 эссэ бүхий ном. Монтений эсээ, үзэл баримтлал, философи нь дэлхийн хэмжээний зохиогчдод гүн нөлөө үзүүлсэн гэгддэг.
10. “Тагтаа”-гийн ямар нэг ном
Гадаад дотоодын утга зохиолын шилмэлүүдийг эрхлэн гаргадаг “Тагтаа” паблишингийн номоос уншаагүй бол даруй аль нэгийг нь уншаарай. “Тэвчихийн аргагүй хөнгөн оршихуй”,”Хувирал” тэргүүт тууж өгүүллэг, “Зүүд бол цорын ганц бодит зүйл” гээд танд олон сонголт бий.