Өмнөговьд шинэ эмнэлэг ашиглалтад орлоо
“Оюу толгой” компанийн “Говийн оюу хөгжлийг дэмжих сан”-гийн санхүүжилтээр 10 ортой шинэ эмнэлэг барьжээ
Өмнөговь аймгийн Баян-Овоо суманд шинэ эмнэлэг ашиглалтад орлоо. Тус эмнэлэг 10 ортой ба 18 эмч, сувилагч, асрагч ажиллаж байна. “Оюу толгой” компанийн “Говийн оюу хөгжлийг дэмжих сан”-гийн санхүүжилтээр хоёр давхар, гражтай эмнэлгийг өнгөрсөн зун барьж, улсын комисст хүлээлгэн өгчээ.
Эмнэлгийн нээлтийн ёслолын үеэр Өмнөговь аймгийн Эрүүл мэндийн газрын дарга Ч. Баяржаргал “Баян-Овоо сум 1700 гаруй хүнтэй. Төвлөрсөн цэвэр бохирд холбогдсон, халдвар, төрөх, хагалгааны өрөөнүүд нь стандартын шаардлага хангасан эмнэлэгтэй болсон нь сумын иргэдэд оруулж буй том хөрөнгө оруулалт болж байна” гэжээ.
Дашрамд сануулахад, “Оюу толгой” компанийн дээрх сангаас өнгөрсөн дөрөвдүгээр сард Өмнөговь аймгийн Даланзадгад суманд хоёр цэцэрлэг барьж өгсөн юм.