Нигерийн шигшээ багийн ДАШТ-ий супер өмсгөл
Нигерийн багийн шинэ өмсгөл маш хөнгөн бөгөөд түүхэн дэх хамгийн өндөр технологи ашиглан хийсэн өмсгөл болжээ.
Ирэх зун ОХУ-д болох хөлбөмбөгийн ДАШТ-д оролцох багууд өмсгөлөө ээлж дараалан танилцуулсаар байна. Африк тивийн Нигери улс өчигдөр шинэ өмсгөлөө танилцуулсан нь шинжээчдийн анхаарлыг ихэд татлаа.
Nike компанийн энэхүү өмсгөл бусад орны өмсгөлийн дэргэд тун өвөрмөц загвар, хийцтэй байгаа юм.
Нэр нь Naija. Naija коллекцид зөвхөн тоглолтын хувцас ороод зогсохгүй малгай, бэлтгэлийн хувцас багтаж байна.
Naija – гэдэг нь орчин үеийн нигери залуусын гаргасан шинэ үг бөгөөд маш олон утгатай. Өөдрөг байдал, нигери үндэстний соёл, уламжлалыг ч мөн энэ үгээр илэрхийлж болно. Харин Nike компани танилцуулахдаа “Шинэ Нигери” гэж орчуулсан юм.
Нигерийн багийн шинэ өмсгөл маш хөнгөн бөгөөд түүхэн дэх хамгийн өндөр технологи ашиглан хийсэн өмсгөл болжээ. Хөлсийг шингээн, агаар нэвтрүүлж, тамирчныг халууцуулахгүй тул ирэх зуны ДАШТ дээр Нигерийн хөлбөмбөгчид хамгийн хурдан, тэсвэртэй байх нь гарцаагүй.