"Ногоон" болон бусад валютаар худалдаа хийх нь хууль бус. Валютаар наймаа хийсэн мэдээллийг 261657 утсаар өгөөрэй
Гадаад валютаар худалдаа хийвэл орлогыг хураах, торгох, тусгай зөвшөөрлийг түдгэлзүүлэх, хүчингүй болгох, үйл ажиллагаа эрхлэх эрхийг цуцлахаар шүүхэд хандах хүртэл хариуцлага хүлээлгэдэг
Монгол Улсын үндэсний мөнгөн тэмдэгт төгрөгийн ханшийг үнэгүйдлээс хамгаалах, иргэд, хуулийн этгээдийн бодит орлого болон худалдан авах чадварыг тогтворжуулахад чиглэсэн “Төлбөр тооцоог үндэсний мөнгөн тэмдэгтээр гүйцэтгэх тухай” хуулийн хэрэгжилтэд Санхүүгийн зохицуулах хороо хяналт тавьж ажилладаг. Энэ чиг үүргийн хүрээнд хяналт шалгалтын ажлуудыг хийж байгаа ч уг хуулийг зөрчсөн үйлдэл тасрахгүй байна. Тиймээс Хороо хууль зөрчсөн талаарх бодит мэдээллийг 261657 дугаарын утсаар тогтмол хүлээн авч байна.
Мөн бараа ажил, үйлчилгээний үнийг Монгол Улсын нутаг дэвсгэрт гагцхүү төгрөгөөр илэрхийлж, түүгээр төлбөр тооцоог гүйцэтгэж хэвшихийг анхааруулж байна. Хууль зөрчин бараа, ажил үйлчилгээнийхээ үнийг төгрөгөөр бус гадаад валют, тооцооны нэгжээр илэрхийлсэн, төлбөр тооцоог гүйцэтгэсэн, зарлан сурталчилсан тохиолдолд тухайн иргэн, хуулийн этгээдийн орлогыг хураах, торгох, тусгай зөвшөөрлийг түдгэлзүүлэх, хүчингүй болгох, үйл ажиллагаа эрхлэх эрхийг цуцлахаар шүүхэд хандах хүртэл хариуцлага хүлээлгэдэг юм.