2 мин

“Пёнчан 2018” олимпийн медальтнууд ямар шагнал авах вэ

Шагналыг харахад медаль авах боломж бага байх тусам хэмжээ нь их байх аж.

М.Сугар-Эрдэнэ 2018.02.12 47 43 4

7

Эрт дээр үеэс л улс орнууд олимп, дэлхийн аваргын медальтнуудаа шагнаж урамшуулдаг уламжлалтай байсан. Шагналыг харахад медаль авах боломж бага байх тусам хэмжээ нь их байх аж. Харин спортын өндөр амжилттай том улсуудын шагнал тун даруухан байна.
Олимпийн медальтнууддаа хамгийн их шагнал өгдөг орон бол Азербайжан. Энэ орны тамирчид Өвлийн олимпийн наадамд алтан медаль авбал 510 мянган доллар авах нь гайхалтай. Гэхдээ авах найдвар тун бага гэдгийг хэлэх хэрэгтэй. Азербайжанд олимпийн мөнгөн медаль 255 мянга, хүрэл медаль 130 мянган долларын шагналтай.

Тэдний араас Төв Азийн Казахстан улс орж байна. Энд алтан медальтан 250 мянган долларын шагнал хүртэж, мөнгө 200 мянга, хүрэл 75 мянгаар үнэлэгддэг. Нэг онцлог нь тухайн тамирчны дасгалжуулагч мөн яг адилхан хэмжээний шагнал авна. Мөн шагналт 4-6 дугаар байрт орсон тамирчин ч мөнгөн шагналтай.   
Украинчууд алтан медальтай тамирчнаа 125 мянгаар урамшуулж, мөнгөн медаль 80 мянга, хүрэл медаль 55 мянган долларын шагналтай. Мөн олимпийн аваргууддаа орчин үеийн сууц амлаж байна.  
Харин Өмнөд Солонгост шагналын систем өөр. Олимпийн аварга хүн 60 мянган доллар авч болох ч түүнийгээ 22 жилийн турш авах сар тутмын 923 долларын тэтгэлгээр сольж болдог.
Хятадад олимпийн аваргадаа 50 мянган доллар олгохоос гадна медальтнуудад татварын олон төрлийн хөнгөлөлт өгдөг.
Австрали улс олимпийн аваргадаа “дөнгөж” 13 мянган доллар өгдөг хамгийн харамч улс юм. Мөн АНУ, Канад, Герман улсууд олимпийн аваргадаа 20-25 мянган доллар шагнадаг байна.

Улс орнуудын олимпийн медальтанд олгодог шагналын хэмжээ

М.Сугар-Эрдэнэ 2018.02.12

7