Олимпийн медальт анхны буриад бөхөд хандив цуглуулж байна
Хэрэв тэр 2008 онд хүрэл медалиа авсан бол Кыргызстан улсаас их хэмжээний шагнал авах байсан нь гарцаагүй.
ОХУ-ын “ВКонтакте” олон нийтийн сүлжээний “Борцы Бурятии” группээс нэгэн хандивийн аян зохион байгуулж байна.
Буриадын бөх Базар Базаргуруевт шагнал гардуулахад зориулсан аян бөгөөд ирэх сарын 10-нд Улаан-Үдэд болох Буриадын тэргүүний нэрэмжит олон улсын тэмцээн дээр гардуулан өгөх юм.
Базарыг шагнах болсон нь тун учиртай. Базар Базаргуруев 2008 онд Бээжингийн олимпод Кыргызстаны нэрийн өмнөөс барилдаж, шагналт 5 дугаар байрт шалгарсан билээ. 2017 оны дөрөвдүгээр сард Дэлхийн бөхийн нэгдсэн холбооноос Бээжинд мөнгөн медаль хүртсэн Украины бөх Василий Федоришин сэргээш хэрэглэсэн нь тогтоогдсон тул медалийг нь хураах шийдвэр гаргасан юм. Ингэснээр Базар 3-р байрт дэвшиж, 9 жилийн дараа олимпийн хүрэл медалиа гардан авсан.
Базар Базаргуруев Олимпийн наадмаас медаль хүртсэн анхны буриад бөх болсон ч эх оронд нь ч, Кыргызстанд ч хэн ч тоосонгүй. Хэрэв тэр 2008 онд хүрэл медалиа авсан бол Кыргызстан улсаас их хэмжээний шагнал авах байсан нь гарцаагүй. Тиймээс “Борцы Бурятии” группын хамт олон хандив цуглуулж, алдарт бөхдөө тус дэм болохыг хичээж байгаа юм.
Базар Базаргуруев одоо Буриадын Агийн дүүргийн Судунтуй тосгонд мал маллаж байгаа гэнэ.