МХБХ Катарын хөлбөмбөгийн холбоотой гэрээ байгууллаа
Хамтын ажиллагааны гэрээ нь ерөнхий, техникийн, шигшээ багуудын гэсэн үндсэн 3 хэсэгт хуваагдаж байгаа юм.
МХБХ, Катарын хөлбөмбөгийн холбооны удирдлагууд Катарын нийслэл Доха хотын “Аль Бидда” цамхагт хамтран ажиллах гэрээнд гарын үсэг зурлаа.
Энэ үйл ажиллагаанд Катарын хөлбөмбөгийн холбооны ерөнхийлөгч Шэйх Хамад бин Халифа бин Ахмед Аль Тани болон МХБХ-ны ерөнхийлөгч А.Ганбаатар, ЕНБД Ө.Шижир нар оролцжээ.
Хамтын ажиллагааны гэрээ нь ерөнхий, техникийн, шигшээ багуудын гэсэн үндсэн 3 хэсэгт хуваагдаж байгаа юм. Монгол улсын үндэсний шигшээ баг ойрын хугацаанд Катарын шигшээ багтай нөхөрсөг тоглолт хийж, бэлтгэл сургуулилалт базаахаас гадна Катартаа төдийгүй дэлхийн олон орныг хамарч чаддаг “Aspire academy”-д монгол хүүхэд суралцах үүд хаалга нээгдэж байгаа юм.
Холбоод хамтран ажиллах гэрээнд туршлага солилцох хэд хэдэн зүйлс байгаа дотор шигшээ багууд, өсвөрийн хөлбөмбөгчид, дасгалжуулагч, шүүгчдийн хөгжилд голчлон анхаарч ажиллах тухай тодорхой тусгасан. Энэ талаар МХБХ-ны Ерөнхийлөгч А.Ганбаатар Катарын телевизэд өгсөн ярилцлагадаа Катар нь Азийн хөлбөмбөгийн том төв болж байгааг дурдаад “Шейх Хамад бин Калифа бин Ахмад Аль Тани Ерөнхийлөгчтэй Катарын Хөлбөмбөгийн Холбооны хамт олон биднийг хүлээн авсанд баяртай байна. Монголын Хөлбөмбөгийн Холбоо, Катарын Хөлбөмбөгийн Холбооны урт хугацааны хамтын ажиллагаа үр дүнгээ өгнө гэдэгт итгэж байна” гэж хэлсэн байна. Энэ он гарсаар МХБХ-ны удирдлагууд Ази тивийн хөлбөмбөгийн томоохон төлөөллүүд болох БНХАУ-ын хөлбөмбөгийн холбоо, Катарын хөлбөмбөгийн холбоотой хамтарч ажиллах гэрээнд гарын үсэг зурж чадлаа.