Алина Загитова “Гар чичирч байсан ч сайхан гулгаж чадлаа”
Нэг талаас баяр баясгалан. Нөгөө талаас нэг тийм хоосон мэдрэмж.
“Пёнчан 2018” олимпийн наадмын ОХУ-ын шигшээ багийн анхны алтан медалийг 15 настай охин Алина Загитова авчирсан билээ. Шинэ аваргатай “Советский спорт” сонины сурвалжлагч уулзан ярилцжээ.
– Сандарч тэвдэв үү?
– Тиймээ, гар чичирч байсан. Гэхдээ бие минь бүх хөдөлгөөнөө мэдэж байсан болохоор зөнгөөрөө сайхан гулгасан. Маш их хариуцлага мэдэрч байлаа. Алдах эрх надад байгаагүй.
– Одоо юу мэдэрч байна вэ?
– Нэг талаас баяр баясгалан. Нөгөө талаас нэг тийм хоосон мэдрэмж. Олимпийн алтан медалиа гартаа бариагүй байгаа болохоор юу мэдэрч байгаагаа хэлж чадахгүй нь.
– Найзаа ялж түрүүлсэн гэхээр бага зэрэг эвгүй санагдаж байна уу?
– Үгүй, маш их баяртай байна. Ер нь би сэтгэлийн хөдөлгөөнөө ил гаргадаггүй, далд хүн.
– Та эхлээд каскад хийх ёстой байсан ч жирийн үсрэлт хийсэн.
– Багш бид хоёр мөсөн дээр болж болох бүх хувилбарыг хийж үздэг. Каскад болоогүй бол өөр үсрэлтэнд нэмэлт зүйл оруулна гээд л. Би яг л тэгсэн.
– Бэлтгэл дээр та гурвалсан үсрэлтийг тав дараалан хийж байсан. Энэ өрсөлдөгчдөө үзүүлэх сэтгэлийн дайралт байсан уу?
– Тиймээ, бэлтгэсэн хөтөлбөрөөсөө илүү зүйл хийж чадна гэдгээ мэдрээд талбайд гарахад гулгахад амар байдаг.
– Цаашдаа дараалаад 6-7 үсрэлт хийх үү?
– Мэдэхгүй, яг үнэнийг хэлэхэд тэр өдөр л анх удаа таван удаа дараалан үсэрч үзсэн юм байна.
– Та спортын оргил дээр гарлаа. Цаашдаа?
– Дэлхийн аваргын тэмцээн байна. Спортод зорилго олон шүү дээ.
– Олимпийн хошой аварга болох?
– Авч болох цом, хэргэм олон бий. Олимпийн аварга бол хамгийн чухал нь.
– Мөнгөн медаль авсан бол сэтгэлээр унах байсан уу?
– Үгүй байх аа. Би чинь саяхнаас олон улсын тэмцээнд орсон залуу тамирчин. Насанд хүрэгчдийн тэмцээнд орсон анхны улирал.
– Медведевагийн сэтгэлийг засах үг хэлэв үү?
– Хэлсэн. Женя ч надад баяр хүргэсэн.
– Хаалтын ажиллагаан дээр ОХУ-ын шигшээ багийн тугч болоход бэлэн үү?
– Мэдээж!