2 мин

Apple компани энэ намар шинээр гурван загвар танилцуулна

Гурван загварын нэг нь хамгийн том дэлгэцтэй iPhone байхаар төлөвлөөд байгаа аж.

2018.02.27 43 33 17

Өчигдөрхөн Самсунг компани хүлээлт үүсгээд байсан шинэ загварын ухаалаг гар утсаа танилцуулсан билээ. Тэгвэл гар утасны томоохон үйлдвэрлэгч компанийн нэг Apple нь энэ намар гурван шинэ загварын iPhone зах зээлд танилцуулахаар бэлдэж буй талаар Блүүмберг мэдээллээ.

Гурван загварын нэг нь урьд өмнөх бүх iPhone-оос хамгийн том хэмжээтэй загвар байх бол хоёр дахь нь iPhone X загварын сайжруулсан хувилбар байх юм байна. Харин гурав дахь загвар хямд үнэтэй, энгийн аж.

Өнгөрсөн онд худалдаалагдаж эхэлсэн iPhone X загварын борлуулалт шинжээчдийн таамаглаж байсан 80.2 саяд хүрэлгүй 77.3 сая хувь борлуулагджээ. Энэхүү үр дүнг тус загварын үнэтэй холбон тайлбарлаж байгаа юм. Тодруулбал, iPhone X загвар нь $1000 зах зээлд худалдаалагдсан билээ. Харин түүний өмнөх загвар болох  iPhone 8 нь хямд үнэтэй байсан талаар шинжээчид дурдаад байна.  

Эхний загвар болох том iPhone нь 6.5 инч дэлгэцтэй байх аж. Энэ хэмжээ нь iPhone 8 Plus-ийн хэмжээтэй ижил боловч iPhone X загвар шиг ирмэгээ хүртэл тэлсэн дэлгэцтэй байх тул хамгийн том дэлгэцтэйд тооцогдоно гэжээ.

Мөн OLED технологийн дэлгэцийг ашиглахаар төлөвлөөд байгаа юм байна. Өнгөны хувьд шинээр алтлаг өнгөний хувилбар нэмж байгааг мөн мэдээлжээ. Харин үнэ хямд загвар нь iPhone X-ийн царайгаар таних систем болон ирмэг хүртлээ тэлсэн дэлгэцтэй юм гэнэ. Хямд байх үзүүлэлт нь дэлгэц нь LCD, ган хүрээгүй, энгийн хөнгөн цагаан эх биетэй байх ажээ. Шинэ загварын IPhone-уудад үйлдвэрлэлийн шатны тестийг хийж байгаа бөгөөд зарим нэг үзүүлэлтүүд өөрчлөгдөх боломжтой талаар эх сурвалжууд мэдээлэлж байна. Ингээд шинэ загварын iPhone-уудыг хүлээх цаг эхэлж байна.

2018.02.27