Монголын эдийн засаг 2009 оноос хойш анх удаа агшлаа
Монгол Улсын ДНБ дэлхийн санхүүгийн хямралыг дагаж 2009 онд 1.3 хувиар агшсан. Харин 2016 оны гуравдугаар улиралд 1.6 хувиар агшсан нь энэ.
Монгол улсын эдийн засаг агшлаа. Он гарсаар ДНБ тодорхой хэмжээнд өсөж байсан ч гуравдугаар улирлын эцсийн байдлаар эдийн засгийн өсөлт хасах 1.6 хувь болж, агшсан байна. Ингэснээр 2009 оноос хойш Монгол Улсын эдийн засаг анх удаагаа агшлаа.
2009 онд Монгол Улсын эдийн засаг дэлхийн санхүүгийн хямралыг дагаж уруудсан. Энэ удаад төлбөрийн тэнцлийн хямралаас болж, агшиж байгаа нь энэ. Үнэндээ олон улсын банк санхүүгийн байгууллагууд Монголын эдийн засгийг ирэх оны нэгдүгээр улирлаас эхэлж агшина гэж тооцоолж байсан юм. Гэхдээ нөхцөл байдал тэдний тооцоолсноос ч муу байгааг дээрх дүн гэрчилж байна. Ямартай 2016 оны эцэст эдийн засгийн өсөлт агшсан байх нь тодорхой болж ирлээ.