мин

АНУ-ын Н-2В визийг дөрөвдүгээр сарын 1-нээс олгож эхэлнэ

АНУ-ын Элчин сайдын яам залруулга гаргав.

Э.Намуун 2018.02.28 35 23 6

Өнгөрсөн сарын 19-нд АНУ-ын ЭСЯ-наас Н-2B визний талаар мэдээлэл хийсэн билээ. Энэ үеэр хөдөө аж ахуйн бус улирлын чанартай ажилд шаардагддаг H-2B визийг гуравдугаар сарын 1-нээс олгож эхэлнэ гэж мэдээлсэн. Гэвч H-2B визийг дөрөвдүгээр сарын 1-нээс олгож эхлэхээр болжээ. Энэ тухайгаа Монгол дахь АНУ-ын Элчин сайдын яам залруулга гарган олон нийтэд мэдээллээ.

Түүнчлэн Гадаад харилцааны яамны Консулын газар даваа гарагт “АНУ-ын Н2 визний хөтөлбөрт хамрагдах” сэдвээр форум зохион байгуулав. Форумын үеэр АНУ-ын ЭСЯ-ны Консулын хэлтсийн дарга Ж.Спэлберг, ХНХЯ-ны Хөдөлмөр эрхлэлтийн бодлогын хэрэгжилтийг зохицуулах газрын дарга Ц.Амартөгс, ХЗДХЯ-ны Гэрээ, эрх зүй, хамтын ажиллагааны газрын дарга Т.Бат-Өлзий, УПЕГ-ын хяналтын прокурор У.Эрдэнэтуяа, ГХЯ-ны Консулын газрын захирал Я.Ариунболд нар мэдээлэл хийж, монгол иргэдийг Н2 виз хөтөлбөрт хамруулах боломжийг нэмэгдүүлэх, иргэдийг мэдээллээр хангах, америкийн болон монголын эрх бүхий аж ахуйн нэгжүүдийн чиг үүргийг тодорхойлох, хууль бус визийн зуучлалтай тэмцэх зэрэг асуудлаар санал солилцов.  

Форумд ХЗДХЯ, УПЕГ, ХНХЯ, Хөдөлмөр, халамжийн үйлчилгээний ерөнхий газрын албаны хүмүүс болон АНУ-д оюутан солилцоо, боловсролын хөтөлбөр хэрэгжүүлдэг компанийн төлөөлөл оролцов. Форумд оролцсон байгууллагуудын мэдээллийг нэгтгэж иргэдэд зориулсан мэдээлэл гаргахаар болжээ.

Э.Намуун 2018.02.28