ВИДЕО: Буриадын Ерөнхийлөгчийн нэрэмжит тэмцээнд Э.Бэхбаяр түрүүллээ
57, 65, 74, 86, 97 кг-ын жингийн барилдаан болж, манай бөхчүүд нэг алт, гурван мөнгө, хоёр хүрэл медаль хүртэв.
ОХУ-ын Улаан-Үд хотод болж байгаа Буриадын Ерөнхийлөгчийн нэрэмжит чөлөөт бөхийн эрэгтэйчүүдийн ОУТ-ий эхний өдөр 57, 65, 74, 86, 97 кг-ын жингийн барилдаан болж, манай бөхчүүд нэг алт, гурван мөнгө, хоёр хүрэл медаль хүртэв.
ДАШТ-ий хошой хүрэл медальт, МУГТ Эрдэнэбатын Бэхбаяр 57 кг-ын жинд түрүүллээ. Тэрбээр Улаан-Үдэд нийт таван барилдаан хийсэн бөгөөд тэгшитгэлд спортын мастер Б.Төгсийг 10:0-ээр, 1/8 шигшээд Б.Түмэнцогтыг 12:1-ээр, шөвгийн наймд ОХУ-ын АШТ-ий хошой хүрэл медальт Якутын Арыйаан Тютринийг 4:2-оор, хагас шигшээд Тувагийн Белек-оол Кужугетийг 3:0-ээр, алтан медалийн төлөөх барилдаанд энэ жилийн Красноярскийн “Алтан Гранпри”-гийн хүрэл медальт Тувагийн Хуреш-Оол Дондук-Оолыг 2:1-ээр тус тус ялсан юм.
74 кг-ын жинд ДАШТ-ий хошой хүрэл медальт, МУГТ Ганзоригийн Мандахнаран, 86 кг-д “Лас-Вегас-2015” ДАШТ-ий мөнгөн медальт, МУГТ Пүрэвжавын Өнөрбат, 97 кг-д ОУХМ Өлзийсайханы Батзул нар мөнгө, 65 кг-д ОУХМ Батчулууны Батмагнай, 86 кг-д Оргодолын Үйтүмэн нар хүрэл медаль хүртлээ гэж Монголын чөлөөт бөхийн холбооноос мэдээллээ.
ЭХНИЙ ӨДРИЙН ДҮН:
57 кг (24 бөх): 1. Эрдэнэбатын Бэхбаяр (Монгол) 2. Хуреш-Оол Дондук-Оол (ОХУ, Тува) 3. Алексей Мантатов (ОХУ, Буриад), Арыйаан Тютрин (ОХУ, Якут)
65 кг (21): 1. Баяр Цыренов (ОХУ, Буриад) 2. Эдуард Григорьев (ОХУ, Якут) 3. Батчулууны Батмагнай (Монгол), Даши Шарастепанов (ОХУ, Буриад)
74 кг (15): 1. Арсалан Будажапов (ОХУ, Буриад) 2. Ганзоригийн Мандахнаран (Монгол) 3. Магомед Дибиргажиев, Магомедрасул Газимагомедов (хоёул ОХУ, Дагестан)
86 кг (10): 1. Даурен Куруглиев (ОХУ, Дагестан) 2. Пүрэвжавын Өнөрбат 3. Оргодолын Үйтүмэн (хоёул Монгол), Канат Бердыев (Казахстан)
97 кг (7): 1. Игорь Овсянников (ОХУ, Красноярск) 2. Өлзийсайханы Батзул (Монгол) 3. Алдар Хамаев (ОХУ-ын Эрхүү)