1 мин

Япон улсад гэрлэлт буурсан тул 18 нас хүрээд иргэн болдог болно

Өмнө нь 20 нас байсан.

2018.03.14 39 21 5

22

Япон улсад залуус 20 насанд хүрээд хууль ёсны үүрэг хариуцлага үүрэх улсын иргэн болдог. Тэгвэл энэ насыг 18 болгохоор тус улсын парламент хэлэлцэж байна. Уг заалт батлагдвал 18 настай иргэд гэрлэлтээ батлуулж, гарын үсэг зуран гэрээ хийж, эцэг эхийн зөвшөөрөлгүй банкны үйлчилгээ авах боломжтой болох юм. Харин 20 нас хүртлээ архи ууж, тамхи татах хориотой хэвээр байх аж. 

Ийнхүү улсын насан хүрэгчдийн насыг өөрчилж байгаа нь Япон улсын хувьд 1876 оноос хойш анхны тохиолдол юм. Одоогийн хуулиар эрчүүд 18, эмэгтэйчүүд 16 нас хүрээд эцэг эхийн зөвшөөрөлтэйгөөр гэрлэлтээ батлуулдаг. Тэгвэл шинэ хуулиар аль аль нь эцэг эхийн зөвшөөрөлгүй болно гэжээ. Насны заалтыг багасгаж байгаа нь тус улсын хүн амын өсөлт бага байгаатай олон улсын шинжээчид холбон тайлбарлаж байна.

Япон улсын 50 нас хүртлэх 4 эрэгтэй тутмын 1 нь, 7 эмэгтэй тутмын 1 нь гэрлээгүй буюу ганц бие гэж бүртгэгджээ. Нийт ганц биечүүдийн тоо хэдийн хүн амын 25 хувьд хүрчээ. 2060 он гэхэд Японы хүн ам одоогийнхоос 33 хувиар буурна гэсэн тооцоо бий. Өөр нэгэн судалгаанаас японы 30-аас доош насны залуусын 1/3 нь огт болзож үзээгүй гэсэн дүн гарчээ. 

Эх сурвалж: BBC

2018.03.14

22