Украины тамирчид ОХУ-д тэмцээнд оролцохгүй
Залуучууд, спортын яамны сайд Игорь Жданов ОХУ-ыг “Эзлэн түрэмгийлэгч улс” гэж нэрлэсэн юм.
Украины ҮОХ-ны дэд ерөнхийлөгч Владимир Брынзак ОХУ-ын нутаг дэвсгэрт явагдах ямар ч тэмцээнд тамирчдаа оролцуулахгүй гэж мэдэгдлээ.
“Спорт-Экспресс” сонинд ярилцлага өгөхдөө тэрбээр “Би өнөөдөр улстөрчидтэй уулзаж, удаан ярилцлаа. Эцэст нь бид ОХУ-д болох бүх тэмцээнд хэсэг хугацаагаар тамирчдаа оролцуулахгүй гэж шийдсэн. Хэрэв хоёр орны улстөрийн байдал сайжирч, энх тайван тогтвол дахин Орост ирж, шударгаар спортын талбайд өрсөлдөхөд бэлэн байна” гэж ярьсан байна.
Энэ сарын 13-нд Украины Залуучууд, спортын яамны сайд Игорь Жданов Оросын Тюменьд болох биатлоны Дэлхийн цомын тэмцээнд оролцохгүй гэдгээ мэдэгдээд ОХУ-ыг “Эзлэн түрэмгийлэгч улс” гэж нэрлэсэн юм.