2 мин

Наохиса Такато: Абэ хэт хүчтэй тул би жин ахихгүй

Би дан ганц жүдод шилдэг нь байх биш бүх юманд шилдэг байхыг хүсдэг.

М.Сугар-Эрдэнэ 2018.03.15 28 24 15

3

Японы жүдоч Наохиса Такато Прагад болсон Европын цомын тэмцээнд ганцаараа жин ахиж оролцсон ч 66 кг-д түрүүлсэн билээ. Медаль гардуулах ёслолын дараа тэр сэтгүүлчдийн асуултад хариулсан байна.

-    Та яагаад Европын цомын тэмцээнд оролцохоор шийдсэн юм бэ?
-    66 кг-д өөрийгөө сорьж үзмээр санагдсан юм. Дасгалжуулагч багш Косэй Иноүэ ч дэмжсэн. 2018 оны ДАШТ-д зодоглох эрхээ авчихсан болохоор надад сонгон шалгаруулах тэмцээнд орох хэрэгцээ байхгүй. Тиймээс улам хүчтэй болохын тулд жин ахиж барилдсан.
-    Ганц удаагийн туршилт уу, жингээ солих гэж байгаа юм уу?
-    Жин ахихгүй. 66 кг-д Хифүми Абэ хэт хүчтэй.
-    Япончууд тэмцээнд орохдоо том багаараа явдаг. Та яагаад ганцаараа Прагад очив?
-    Ганцаараа явахыг хүсээд л тэр. Би дан ганц жүдод шилдэг нь байх биш бүх юманд шилдэг байхыг хүсдэг. Жишээ нь, хүмүүстэй харилцаа холбоо тогтоож, нөхөрлөх тал дээр. Тийм болохоор л ганцаараа явсан.
-    60 кг, 66 кг-ийн жингийн ялгаа ямар байв?
-    Миний хувьд гол ялгаа нь жин хасах хэрэг гарсангүй. Жирийн үеийнхээ жинтэй барилдаж үзлээ. Өрсөлдөгчид минь өндөр байсан ч асуудал гарсангүй. Би багаасаа өөрөөсөө том, өндөр өрсөлдөгчидтэй бэлтгэл хийж байлаа.
-    Дасгалжуулагч чинь хамт явсан мөртлөө барилдаанд хамт гараагүй. Яагаад?
-    Ганцаараа байхыг хүссэн болохоор. Дасгалжуулагчгүй барилдаж үзмээр байсан. Олимп, дэлхийн аваргын тэмцээн дээр юу тохиолдохыг урьдчилан мэдэхгүй шүү дээ. Хэн нэгнээс хамааралгүй, ямар ч нөхцөлд тэмцэж чаддаг байх хэрэгтэй.
-    Ганцаараа хүн бие халаалт, бэлтгэл яаж хийж байв?
-    Испанийн шигшээ багийн дасгалжуулагч, анд найз Сүгой Уриартегаас тусламж хүссэн. Тэдний багийн Андрес Ромеротой бэлтгэл хийсэн. Би хүмүүстэй харьцаж, тэднээс ямар нэг тусламж хүсэх дуртай.  
-    60 кг-ийн жингийн чансаанд Рюүжи Нагаяма таныг гүйцээд ирсэн. Удахгүй ДАШТ болж, та цолоо хамгаална. Рюүжитэй өрсөлдөхөд ямар байдаг вэ?
-    Өнөөдөр би 66 кг-д барилдлаа. 60-д эргээд очихоороо хэн нь жиндээ шилдэг нь вэ гэдгийг харуулах болно.
-    Цаашдын төлөвлөгөө?
-    Одоохондоо шийдээгүй байна. Гол зорилго бол Бакуд болох ДАШТ. Өмнө нь нэг тэмцээнд орно, гэхдээ ямар тэмцээн гэдгээ шийдээгүй байгаа.
-    Ганцаараа тэмцээнд орохыг хүссэн гэж ярьсан. Ямар байна?
-    Их ядарлаа.

М.Сугар-Эрдэнэ 2018.03.15

3