Илья Ковальчук олимпийн шагналаа буяны үйлсэд зориулна
BMW X5 машинаа үнэ хаялцуулж зарна гэдгээ мэдэгдлээ.
ОХУ-ын хоккейн шигшээ багийн тамирчин Илья Ковальчук “Пёнчан 2018” олимпийн наадамд түрүүлээд авсан шагналын BMW X5 машинаа үнэ хаялцуулж зарна гэдгээ мэдэгдлээ. Аукционоос орсон мөнгөө тэр буяны үйлсэд зориулах гэнэ.
Илья “Би энэ мөнгийг Асрах газар, эсвэл яаралтай хагалгаа хэрэгтэй болсон ямар нэг хүүхдэд зориулна. Машинаас гадна надад Пёнчаны олимпийн өөр олон дурсгалт зүйл бий. Аваргын төлөө тоглолтод өмссөн өмсгөл байна. Надад маш үнэтэй эд. Яагаад гэвэл цаашдаа ОХУ-ын шигшээ баг эх орныхоо сүлдтэй өмсгөлтэй тоглоно гэдэгт найдаж байна” гэж сэтгүүлчдэд ярьсан байна.
Энэ сарын эхээр Оросын өөр хоёр тамирчин машинаа зарж, мөнгийг нь хандивлана гэдгээ зарласан. Фристайлийн Илья Буров BMW X4 машинаа зарахаа зарласан бол auto.ru сайт дээр нэрээ мэдэгдэхийг хүсээгүй нэгэн тамирчин мөн олимпийн тэмдэгтэй BMW X4 машинаа зарах зарлал тавьсан байлаа.
ОХУ-ын Засгийн газраас “Пёнчан 2018” наадамд алтан медаль хүртсэн тамирчдад BMW X5, мөнгө, хүрэл медальтанд BMW X4 олгосон бөгөөд нийт 46 тамирчин машин гардан авсан юм.