1 мин

Монголын самбочид алдарт “Белаз”-тай хамтрахаар боллоо

Монголын самбочдыг "БЕЛАЗ" ивээн тэтгэнэ.

М.Сугар-Эрдэнэ 2018.03.16 43 41 38

36

Монголын самбо бөхийн холбоо Беларусийн “Белаз” автомашины компанииай хамтран ажиллахаар болжээ.  Хамтын ажиллагааны гэрээнд гарын үсэг зурах ёслол энэ сарын 14-нд болж, Монголын самбо бөхийн холбооны ерөнхийлөгч, ТЕГ-ын дарга Д.Гэрэл, Беларусийн Худалдаа аж үйлдвэрийн тэнхимийн төлөөлөгч Леонид Яковлевич Слободский, Монголын самбо бөхийн холбооны ерөнхий нарийн бичгийн дарга, самбо бөхийн дэлхийн аварга Б.Ариун-Эрдэнэ, Беларусийн алдарт бөх, самбо бөхийн дэлхийн гурван удаагийн аварга, 1980-аад оны үед дэлхийн дэвжээнд өнөөгийн Монгол Улсын Ерөнхийлөгч, дэлхийн аварга Х.Баттулгатай хүч үзэж явсан Владимир Геннадиевич Япринцев нар оролцлоо.

Энэ онд Монголын самбо бөхийн холбоо байгуулагдсаны 50 жилийн ой тохиож байгаа бөгөөд тус ойн хүрээнд хийсэн хамгийн том ажил нь уг гэрээнд гарын үсэг зурах ёслол байсныг Д.Гэрэл онцлов. Монголын самбо бөхийн тамирчид 1973 онд Ираны Тегеранд болсон дэлхийн аварга шалгаруулах тэмцээнд анх удаа оролцож гавьяат тамирчин Ш.Чанрав алтан медаль хүртсэн түүхтэй. Тэр цагаас хойш Монголын тамирчдаас энэхүү спортоор 37 дэлхийн аварга цолтон төрөөд байна. Самбо бөхийн спортыг Монголд түгээн дэлгэрүүлэх, хөгжүүлэхэд түлхэц үзүүлэхээр “Белаз” компани ийнхүү хамтран ажиллахаар боллоо. Тус компанийнхан хэдхэн хоногийн өмнө болсон гавьяат дасгалжуулагч Ж.Баярсайханы нэрэмжит залуучуудын улсын аварга шалгаруулах тэмцээний ерөнхий ивээн тэтгэгчээр ажилласан. Цаашид Беларусь, Монголын баг тамирчид хамтарсан бэлтгэл сургуулилт хийж, тамирчин солилцож, дасгалжуулагчдын ур чадварыг дээшлүүлэх тал дээр хамтран ажиллах юм.

М.Сугар-Эрдэнэ 2018.03.16

36