2 мин

Оюутолгойн 2009 оны гэрээг үзэглэсний дараа С.Баярцогтын данс руу 10 сая ам.доллар оржээ

Энэ тухай Reuters агентлаг мэдээлсэн юм.

Э.Хулан 2018.03.19

Швейцарь улсын хуулийн дээд байгууллага тус улсын банкин дахь нийтдээ 1.85 сая ам.долларын үлдэгдэлтэй данснуудыг царцаасан тухай мэдээлжээ.

Рио Тинтогийн олборлолтын гэрээг саадгүй байгуулахад дэмжлэг үзүүлсэн байж болзошгүй Монгол Улсын экс Сангийн сайдын авлигын хэргийг шалгах ажлын хүрээнд ийм арга хэмжээ авсан байна.

Данснуудын нэгийг Рио Тинтогоос Сангийн сайд асан С.Баярцогтод 10 сая ам.долларыг шилжүүлэхэд ашигласан гэж сэжиглэж байгаагаа Швейцарийн Ерөнхий Прокурорын мэдэгдэлд өгүүлжээ.

Монгол улсын Авлигатай Тэмцэх Газар 2009 онд Рио Тинтотой С.Баярцогтын байгуулсан хөрөнгө оруулалтын гэрээг шалгаж байгаа юм. Уг гэрээг байгуулсны үр дүнд Британи-Австралийн Рио Тинто компани Оюу Толгойн төслөө эхлүүлжээ.

Шүүхийн тогтоолд одоо 5.3 тэрбум ам.долларын өргөтгөл хийж байгаа Оюу Толгой төслийн үйл ажиллагаатай холбоотой ямар нэг алдаа дутагдлын талаар дурдаагүй байна.

Прокурорын мэдэгдэлд “Гадаад орны засгийн газрын сайдын албан тушаалд дөнгөж томилогдсон хүн ийм их хэмжээний мөнгө хүлээн авсан нь маш их сэжигтэй байна” гэжээ.

Мөн “Сангийн сайд байхдаа С.Баярцогтын гарын үсэг зурсан гэрээ Монголын талд хохиролтой байх шинж тэмдгүүд ажиглагдаж байна” гэсэн байна.

2008 оны есдүгээр сард буюу С.Баярцогтыг сангийн сайдаар томилогдсон тэр сард 10 сая ам.долларыг түүний нэрийн дансанд шилжүүлсэн байжээ.

Швейцарийн Ерөнхий Прокурорын төлөөлөгч хэргийг үргэлжлүүлэн шалгаж байгаа гээд үүнээс илүү дэлгэрэнгүй мэдээлэл өгөхөөс татгалзсан байна. Мөн хэргийг нотлох хүртэл нэр дурдагдсан хувь хүн, компанийг албан ёсоор буруутайд тооцохгүй гэдгийг мэдэгджээ.

С.Баярцогт энэ хэргийг үгүйсгэсэн мэдээлэл 2016 оны зургаадугаар сард "Mongol HD" телевизэд өгч байсан юм.