Роналдуд талбай дээр ч бие хамгаалагч хэрэгтэй
Роналдуд хүрэх гэж өчигдөр гурван фэн талбай дээр гүйн гарсан.
Өчигдөр Швейцарийн Женев хотод Голланд, Португалийн шигшээ багууд нөхөрсөг тоглолт хийлээ. Тайван амгалан Женевт ч үнэнч фэнүүд нь Роналдуг харан, солиорох шахаж байв.
Роналдуд хүрэх гэж өчигдөр гурван фэн талбай дээр гүйн гарсан. Хоёрдугаар үед Португалийн Жоау Канселу улаан хуудас авч, тоглолт түр зогссоныг тэд ашигласан.
Эхний фэн Роналдуг үнссэн.
Тэгээд өөрөг зураг авахуулсан.
Хоёр дахь нь Роналдуд зүрх харуулаад тэвэрсэн.
“Реал”-ын өмсгөлтэй байсан түүнийг хамгаалагч нар талбайгаас гаргасан.
Гурав дахь нь харин азгүй байлаа. Тэр шүтээнийхээ тохойнд хүрээд л баригдсан юм.
Роналдуг 68 дахь минутад сэлгээгээр сууж байхад дөрөв дэх “халдлага” боллоо.
Криштиану ааш муу байгаа нь илт харагдаж байлаа. Аргагүй баг нь 0-3 ялагдаж, өөрөө хаалга руу ганц ч цохиогүй юм.
Ер нь Криштиану фэнүүдийн ийм “халдлагыг” тоодоггүй. Хүссэн хүнтэй нь селфи авахуулахыг зөвшөөрдөг.
Гэхдээ мэдээж аюулгүй байдлаа бодно. 2014 оны ДАШТ-д тэр 4 бие хамгаалагчтай байсан бол Мароккод болсон клубуудын аваргын тэмцээнд таван хамгаалагч хөлсөлсөн байлаа.