Монгол охин “Дэлхийн бяцхан мисс” болжээ
Тэргүүн байрын шагнал хүртсэн М.Ану урлагийн үзлэгт “Саруул тал” дууг дуулсан нь шүүгчдээс өндөр оноо авсан байна.
“Энэ сарын 12-16-нд Гүржийн Батумид болсон “Дэлхийн бяцхан мисс” уралдаанд монгол охин түрүүллээ” гэж “Forbes Kazakhstan” мэдээллээ.
Тэмцээнд 80 орны төлөөлөгчид оролцсоноос Монголын М.Ану түрүүлжээ.
Бяцхан миссүүд 4 шатны тэмцээнд оролцсон байна. Үндэсний хоол хийж, үндэсний хувцсаа өмсөхөөс гадна загвар үзүүлэх, урлагийн номер гэсэн даалгавруудыг гүйцэтгэжээ.
Тэргүүн байрын шагнал хүртсэн М.Ану урлагийн үзлэгт “Саруул тал” дууг дуулсан нь шүүгчдээс өндөр оноо авсан байна. М.Ану охин 21 дүгээр сургуулийн 4-р ангид сурдаг. 2016 оны наймдугаар сард олон улсын загварын шоунд оролцож байжээ. Тэрбээр дуу дуулах дуртай, анхны цомгоо гаргахаар ажиллаж байгаа гэнэ.