Доналд Трамп: Ким Жон Унтай уулзах боломжтой 5 газар бий
Шинжээчдийн үзэж байгаагаар хамгийн магадлал өндөртэй нь манай нийслэл Улаанбаатар байгаа юм.
Японы Ерөнхий сайд Шинзо Абэ АНУ-д айлчилж байна. Өчигдөр Ерөнхийлөгч Доналд Трамп өргөөндөө Шинзо Абэг хүлээн авч уулзлаа. Тэдний ярианы гол сэдэв Хойд Солонгос бөгөөд мөн худалдааны асуудлын талаар хөндөх гэнэ.
Уулзалтын дараа хоёр орны Төрийн тэргүүд сэтгүүлчдэд мэдээлэл өглөө.
Трамп Хойд Солонгосын асуудлыг шийдэхэд АНУ, Япон улсууд хөл нийлүүлэн алхаж байна гэсэн бол Шинзо Абэ БНАСАУ-ын Удирдагчтай уулзахаар болсон Трампын эр зоригоор бахархаж байна гэж ярив.
“Ким Жон Унтай хаана уулзах вэ” гэсэн сэтгүүлчийн асуултад Трамп түүнтэй уулзах боломжтой таван газар бий гэж хариулсан ч ямар 5 газар болохыг хэлсэнгүй. Шинжээчдийн үзэж байгаагаар хамгийн магадлал өндөртэй нь манай нийслэл Улаанбаатар байгаа юм. Монголоос гадна Швед улс АНУ, БНАСАУ-ын дээд хэмжээний уулзалтыг зохион байгуулах санал тавиад байгаа билээ.