Өмнөд Солонгосоос ачаа хурдан ирдэг болно
Шинэ маршрутаар ачааны галт тэрэг долоо хоногт нэг удаа зорчих юм.
Энэ сарын 18-нд олон улсын төмөр зам-тэнгисийн тээврийн шинэ маршрутын нээлт боллоо. Шинэ маршрут нь Өмнөд Солонгосоос гарч, Хятадын Циньхуандаог дайраад Улаанбаатарт ирэх юм.
Нээлтийн галт тэрэг 18-ны өдрийн 10 цагт Хэбэй мужийн Циньхуандао хотоос манай нийслэлийг зорин хөдлөсөн бөгөөд БНСУ-аас усан онгоцоор ирсэн цахилгаан хэрэгсэл, авто машин ачсан нийт 100 контейнер байв.
Шинэ маршрутаар ачааны галт тэрэг долоо хоногт нэг удаа зорчих бөгөөд энэ оны сүүлчээр долоо хоногт хоёр удаа болж нэмэгдэнэ. Энэ нь Өмнөд Солонгосоос Монголд ирэх ачаа, карго хурдан шуурхай боллоо гэсэн үг. Циньхуандао нь Инчёнтой усан замаар шууд холбогддог боомт юм.