БНХАУ мазаалайг хамгаалахад зориулж 11.63 сая юанийн төсөл хэрэгжүүлнэ
Төсөл нийт 3 жил үргэлжилнэ.
БНХАУ-ын Засгийн газрын буцалтгүй тусламжаар хэрэгжих Монгол Улсын говийн мазаалай баавгайг хамгаалах техникийн туслалцаа үзүүлэх төсөл хэрэгжүүлэх хэлэлцээрт гарын үсэг зурах ёслол боллоо.
Энэхүү хэлэлцээрийн дагуу Хятадын тал Монголын талтай хамтран мазаалай баавгайн амьдрах орчны менежментийн төслийн судалгаа, мазаалай баавгайн амьдрах орчны экологийн чанарын үнэлгээний судалгаа, хүнсний ургамлын популяцийн судалгаа хийх юм. Мөн биологийн олон янз байдлын мониторингийн судалгааг хийж гүйцэтгэх бөгөөд Монголын Их говийн тусгай хамгаалалттай газарт техникийн болон мэргэжлийн хүмүүст газар дээрх сургалт зохион байгуулна.
БНХАУ-д хоёр удаагийн сургалт зохион байгуулах бөгөөд төсөлд шаардлагатай тоног төхөөрөмж, материалаар хангах, төслийн хэрэгжилтийн хугацаанд мазаалай баавгайн тэжээлд зориулан жилд 20 тонн улаан буудайн үр олгоно. Төслийн нийт өртөг 11.63 сая юанийн санхүүжилттэй ба төсөл 3 жилийн хугацаанд хэрэгжинэ.
Энэхүү хэлэлцээрт МУ-ын БОАЖЯ-ны Хүрээлэн буй орчин, байгалийн нөөцийн удирдлагын газрын дарга Г.Нямдаваа, БНХАУ-аас Монгол Улсад суугаа ЭСЯ-ны Худалдаа, эдийн засгийн зөвлөх Сун Вэрэн нар гарын үсэг зурлаа. Гарын үсэг зурах ёслолын арга хэмжээний үеэр Монгол Улсын Байгаль орчин, аялал жуулчлалын дэд сайд Ц.Батбаяр, БНХАУ-аас Монгол Улсад суугаа Элчин сайдын хэргийг түр хамаарагч Ян Чиндун нар баяр хүргэж үг хэллээ.